Qazaqstanda sibir jarasynyń taralýyna sapasyz ekpe sebep boldy
ASTANA. QazAqparat - Ótken jyly Qazaqstanda sibir jarasynyń taralýyna sapasyz ekpe sebep boldy, dep habarlaıdy QazAqparat.
«2016 jyly sibir jarasynyń Shyǵys Qazaqstan, Qaraǵandy, Batys Qazaqstan, Pavlodar oblystarynda bes oshaǵy tirkeldi. Osy oraıda atalǵan indetke qarsy egilgen vaktsınalardyń úlgileri Ýkraına men Efıopııanyń halyqaralyq referenttik zerthanalaryna saraptamaǵa jiberildi. Zertteý nátıjeleri vaktsınalardyń tıisti parametrlerge sáıkes kelmeıtindigin rastady. Materıaldar quqyq qorǵaý organdaryna joldanyp, ekpeni jetkizýshi tarap óz mindetin adal atqarmaıtyn kompanııa retinde tanyldy»,-dedi Úkimet otyrysynda QR Aýyl sharýashylyǵy birinshi vıtse-mınıstri Qaırat Aıtýǵanov.
Onyń sózine qaraǵanda, sapasyz vaktsınany jetkizýshi 71 mln. teńge somasyndaǵy barlyq 13 mln. dozany aýystyrdy.
«Osyndaı jaǵdaıǵa jol bermes úshin memlekettik satyp alýlar týraly shartqa tapsyrys berýshi belgilegen zerthanalarda jetkizýshi taraptyń esebinen ekpe sapasyn mindetti tekserý normasy engizildi»,-dedi vıtse-mınıstr.
Belgili bolǵandaı, eger de ótken jylǵy 1 mamyrdaǵy jaǵdaı boıynsha janýarlar indetiniń 36 oshaǵy tirkelse, aǵymdaǵy jyly 23 oshaǵy anyqtaldy, ıaǵnı 36 paıyzǵa tómendeý baıqaldy.
«2017 jyldyń veterınarlyq-profılaktıkalyq is-sharalaryna sáıkes, 17 asa qaýipti aýrýlarǵa qarsy 150 mln. ekpe jasaý josparlanǵan. Onyń ishinde jyl basynan qazirgi kezeńge deıin 60 mln. ekpe qarastyrylǵan»,-dedi vıtse-mınıstr.
Munymen qosa, janýarlardyń asa qaýipti aýrýlaryna qatysty 70 mln. dıangnostıkalyq tekserý júrgizý josparǵa engizildi.
