Qazaqstanda sibir jarasy boıynsha jaǵdaı ýshyqqan joq - AShM

ASTANA. QazAqparat - Búgingi kúni Qazaqstanda sibir jarasy boıynsha jaǵdaı ýshyqqan joq. Bul týraly búgin Qazaqstan et odaǵynyń kezekten tys sezi barysynda QR Aýyl sharýashylyǵy mınıstrligi Strategııalyq josparlaý jáne taldaý departamentiniń dırektory Serik Ybraev málim etti.

«Sibir jarasy týraly fakt tek Qaraǵandy oblysynda ǵana rastaldy. Almaty oblysynda bul áli rastalǵan joq. Sondyqtan da, meniń oıymsha, jaǵdaı sonshalyqty alańdaıtyndaı ýshyqqan emes, degenmen máseleler barshylyq», - dedi departament basshysy. Bul rette dırektor Qaraǵandydaǵy oqıǵaǵa toqtala kele, onda densaýlyq saqtaý qyzmetiniń jedel áreket etip, nazar aýdarmaǵany úlken problema bolǵanyn aıtady. «Adam bir aptaǵa jýyq medıtsınalyq kómekten tys qalǵan, sonyń saldarynan eki birdeı kisi ólimi oryn aldy. Onyń oryn alýy da zańdy, óıtkeni tıisti áreketter atqarylmady», - deıdi S. Ybraev.

Aıta keterligi, qazirgi tańda Qazaqstannyń et odaǵy veterınarııa salasynda aýqymdy reformalar júrgizýdi, sonymen birge veterınarlyq baqylaýdy kúsheıtý qajettigin kótergen bolatyn. Óıtkeni, eldegi sońǵy oqıǵalarǵa baılanysty kórshiles Reseı qazaqstandyq eksporttaýshylardyń ónimine shekteý engizgen.

Mınıstrlik ókiliniń aıtýyna qaraǵanda, qazaqstandyq tarap Reseıdiń vetarınarlyq baqylaý qyzmetimen kelissózder júrgizip, qazaqstandyq et ónimine shekteýdi alyp tastaý máselesin qozǵaýda. «Biz kelissózderdi júrgizip jatyrmyz. Jaqyn aralyqta bul másele óz sheshimin tabady dep oılaımyn», - dedi departament basshysy.