Qazaqstanda shynymen strıtreıserler joq pa?
ASTANA. QazAqparat - Qazaqstan aýmaǵynda birde-bir sanktsııalanbaǵan túngi kólik jarysy tirkelgen joq. QazAqparattyń resmı saýalyna oraı QR Іshki ister mınıstrligi osylaı dep jaýap berdi.
«Qazirgi ýaqytta respýblıka aýmaǵynda túngi ýaqytta sanktsııalanbaǵan jarystar tirkelmegen. Jol-patrýldik polıtsııasy kólik quraldarynyń toptyq, sanktsııalanbaǵan jáne uıymdastyrylmaǵan qozǵalysyna, manevr jasaý qaǵıdalary men jyldamdyq rejimin óreskel buzý faktilerin táýliktiń kúndizgi jáne túngi mezgilderinde qalanyń magıstraldi kóshelerinen anyqtaý jáne jolyn kesý maqsatynda sharalar qabyldaýda. Qurylymdyq bólinister sanktsııalanbaǵan jarystardyń jolyn kesý, tynyshtyqty buzý, qoǵamdyq tártipti jáne basqa da jol júrisi qaǵıdalaryn buzý áreketteriniń aldyn alý sharalaryn turaqty negizde júrgizedi», - depti mınıstrlikten.
Alaıda, taıaýda Ortalyq kommýnıkatsııalar qyzmetindegi brıfıngte Qazaqstan Avtomotosport federatsııasynyń prezıdenti Marat Ábiqaev Astana men Almaty qalalarynda túngi kóshedegi kólik jarystary bolyp turatyndyǵyn ashyq aıtqan bolatyn.
«Ókinishke oraı, strıtreıserlerdiń (túngi qaladaǵy kólik jarystary) basym bóligi Almaty men Astana qalalarynda oryn alady. Ol balalardyń deni sportshylar emes. Biz olardy sport alańdary joldaryna tartý úshin jumystar júrgizip jatyrmyz. Óıtkeni, olar sporttyq sharalarǵa qatysatyn bolsa, osy ýaqytqa deıin aınalysqan tirlikterin toqtatady. Buǵan qosa, sport alańdaryna ózderiniń dostaryn tartatyn bolady. Ókinishke oraı olardy ózińe tartýdan ózge yqpal etý tetigi joq. Sondyqtan munymen quqyq qorǵaý organdar aınalysady jáne biz olarmen tyǵyz jumys isteýge tyrysamyz», - dedi ol.
