Qazaqstanda shyǵatyn materıaldardyń 20 paıyzynda ultaralyq kelispeýshilikti týdyratyn astyrtyn oı bar
ASTANA. Qazannyń 18-i. QazAqparat /Arman Asqarov/ - Búgingi tańda elimizde ultaralyq kelisim taqyrybyna arnalǵan maqalalardyń basym bóliginde taldamaly mazmun joq.
Búgin Eýrazııa ulttyq ýnıversıtetindegi «BAQ-tyń etnosaralyq tózimdilikti damytý jolyndaǵy róli» taqyrybyndaǵy halyqaralyq ǵylymı semınarda Qazaqstan halqy assambleıasy tóraǵasynyń orynbasary Eraly Toǵjanov osylaı aıtty, dep habarlaıdy QazAqparat.
Onyń aıtýynsha, qazirgi kezde qazaqstandyq buqaralyq aqparat quraldarynda ultaralyq kelisim ıdeıasyn nasıhattaý jumysy júıeli túrde júrgizilmeı keledi. Jýrnalıstıkanyń etnıkalyq salasy durys jolǵa qoıylmaǵan. Materıaldar ishki ultaralyq qarym-qatynas problemalarynan shyǵa almaıdy, al jaryqqa shyǵyp jatqan maqalalardyń taldamaly mazmuny joq. Onyń basty sebebi - jýrnalısterdiń izdenbeı jatýy. «Sotsıolog sarapshylardyń sońǵy zertteýleri boıynsha BAQ betterinde jaryq kórgen maqalalar ǵana ultaralyq arazdyqty týdyrady jáne osy etnosaralyq qaıshylyqtardyń aldyn alýyn qamtamasyz ete alady. Al osy taqyrypqa arnalǵan qazaqstandyq materıaldardyń 20 paıyzynda ultaralyq qaıshylyqty týdyratyn astyrtyn oı bar. Ásirese, bul úrdis keıbir Internet saıttarynda ashyq kórinedi. Onymen olar saıtqa kirýshilerdi kóptep tartýǵa tyrysady. Sondyqtan búginde biz osy oraıda qazaqstandyq jýrnalıstıkanyń 80 paıyzynda qalyptasqan tájirıbeni keńinen nasıhattaýǵa mindettimiz. Aıta keteıin, aqparattyń tapshylyǵy ǵana ósek-aıań men teris pikirdi týdyrady. Men bilem, qazaqstandyq BAQ-tyń aqparattyq áleýeti joǵary», - dedi E.Toǵjanov.
