Qazaqstanda shyǵarmashyl jastardyń óz múmkindikterin kórsetýge barlyq jaǵdaılar jasalynǵan - QR Tuńǵysh Prezıdenti qorynyń grant ıegerleri

Baýyrjan Umbaev óz dostary Andreı Tsoı men Dáýren Erejepovpen birge «Ósimdikten alynǵan rekombınanttyq gerýdın negizinde jasalynǵan syrttan qoldanatyn tamyr jarylýyna qarsy dármekti jasaý» ǵylymı-zertteý jobasyn usynǵan. Olardyń jumystary ǵylym salasy boıynsha úzdikterdiń qataryna endi.

Baýyrjan Umbaevtyń aıtýynsha, rekombınanttyq gerýdındi alý men testtik preparat Qazaqstanda birinshi ret jasalýda. «Bizdiń joba gerýdın negizinde, kúre tamyrlarynyń keńeıýiniń aldyn-alýǵa arnalǵan jaqpany jasaýmen baılanysty. Gerýdın tabıǵı ónim jáne eshqandaı allergııalyq áser bermeıdi Búginde, bul aýrýdyń túri óte kóp taralǵan. Sondyqtan da, bizdiń joba mańyzdy da, ózekti taqyryp bolyp tabylady. Bul joba aldaǵy ýaqytta farmatsevtıkalyq jáne medıtsınalyq salaǵa engiziletin úlken bastamanyń negizi bola alady», - dep atap ótti ol.

Onyń pikirinshe, qazaqstandyq ǵalymdar ǵylymdy eń búgingi zamanaýı deńgeıde jasaýda jáne bizdiń ǵalymdar halyqaralyq ǵylymı úderistermen birge keledi. «Jas qazaqstandyqtar bilimge umtylýda. Biz jas elmiz, sondyqtan, bizdiń múmkindigimiz, áleýetimiz kóp. Memleket árdaıym osylaı qoldaý kórsete berse, ǵylymnyń odan ári qaryshtap damıtynyna senemin. Jastardyń boıynda ǵylymǵa degen qyzyǵýshylyq bar. Oǵan doktorantýraǵa túserde bir orynǵa 15 adamnyń úmitker bolýy dálel bola alady. Ǵylymǵa biz sııaqty ómirin arnaýshylar aramyzda az emes», - dedi ol.

Ekinshi jas ǵalym Dáýren Erejepovtyń pikirinshe, búginde Bilim jáne ǵylym mınıstrligi jastarǵa barlyq jaǵdaıdy jasaýda. «Men Ál-Farabı atyndaǵy QazUÝ-de oqydym. Osy oqý orny bıologııa fakýltetiniń bakalavrıat, magıstratýra jáne doktorantýrasyn támamdadym. Bıotehnologııa boıynsha qazaq tilinde alǵashqy bitirgenderdiń birimin. Munda jas ǵalymdarǵa barlyq jaǵdaılar jasalǵan. Oqý ordasynda jumys isteýge qajetti qural-jabdyqtar bar, jańasyn da alyp jatyr, kerekti reaktıvterdi de alýda. Álemniń jetekshi ǵylymı ortalyqtarynda taǵlymdamadan ótýge múmkindikterdi de jasaýda. Men Avstrııada oqyp kelsem, áriptesterim Amerıkada bilimderin jetildirip keldi». -dedi ol.

Onyń pikirinshe, toppen jumys isteý jeńil. «Árqaısymyz bir-birimizdi tolyqtyryp otyramyz. Bizge bul jobany iske asyrýǵa bir jyl ýaqyt berdi, el táýelsizdiginiń 20 jyldyǵyn toılaýǵa deıin oıdaǵydaı bitiremiz dep oılaımyn», - dedi bıolog Dáýren Erejepov.

Jas ǵalymdardyń aıtýynsha, granttar jobany iske asyrýǵa qajetti shyǵys materıaldar men jabdyqtardy alýǵa jumsalmaq.