Qazaqstanda shveıtsarııalyq tehnologııamen vagondar qurastyrylatyn boldy

ASTANA. QazAqparat - 14 jeltoqsanda «QTJ» UK» AQ kompanııalar toby men «Stadler» kompanııasy otandyq vagon qurastyrý zaýyty bazasynda shveıtsarııalyq tehnologııa boıynsha jınalatyn jolaýshylar vagondaryn jetkizý jáne tehnıkalyq qyzmet kórsetý shartyna qol qoıdy, dep habarlaıdy QazAqparat.

Sharttar 2021 jylǵy 29 qarashada Memleket basshysynyń Shveıtsarııaǵa resmı sapary kezinde qol qoıylǵan kompanııalar arasyndaǵy strategııalyq yntymaqtastyq týraly kelisimdi iske asyrý sheńberinde jasaldy.

Stadler kompanııasy 2023 jyldan bastap 2030 jyldy qosa alǵandaǵy kezeńde «QTJ» UK» AQ toby úshin 537 jolaýshylar vagonyn qurastyrýdy uıymdastyrý úshin zaýyttyń óndiristik alańy men jabdyqtaryn jańǵyrtýdy josparlap otyr.

«QTJ» UK» AQ men Stadler kompanııasy yntymaqtastyǵyn iske asyrýdyń qorytyndysynda jolaýshylar vagon parkiniń tehnıkalyq jaı-kúıin edáýir jaqsartý, jolaýshylar qaýipsizdigi men jaılylyǵyn arttyrý bolady.

Aıta keteıik, Stadler kompanııasy - joǵary sapa deńgeıimen, zamanaýı jabdyqtardyń bolýymen jáne biregeı noý-haý tehnologııalarymen erekshelenetin temirjol jyljymaly quramynyń iri eýropalyq óndirýshisi.

Shveıtsarııalyq kompanııanyń jyljymaly quramdary 45 elde, sonyń ishinde qystyń qatal aýa raıymen erekshelenetin skandınavııalyq elderde paıdalanylyp keledi, óıtkeni olar aýamen jylytylady jáne qosymsha jylytqyshtarmen aýa baptaıdy, dızelmen jáne elektrmen jumys isteıdi.