Qazaqstanda ishtegi balanyń ákeligin anyqtaý zertteýi engiziledi – Ádilet mınıstrligi
ASTANA. KAZINFORM – Bıyl DNQ saraptamasy salasyn damytý maqsatynda jańa qural-jabdyqtar satyp alý josparlanyp otyr. Bul týraly Ortalyq kommýnıkatsııalar qyzmeti alańynda ótken brıfıngide QR Ádilet mınıstrligi Sot saraptamalary ortalyǵynyń dırektory Baqytjan Baıtilesov málim etti.
Onyń aıtýynsha, jańa tehnologııalar qaıtys bolǵan adamnyń syrtqy kelbetin anyqtaýǵa múmkindik beredi.
– Jańa quraldar arqyly qaıtys bolǵan adamnyń túr-álpetin, kóziniń jáne shashynyń túsin anyqtaýǵa bolady. Osyndaı qural-jabdyqtardy alý josparlanyp otyr, – dedi Baqytjan Baıtilesov.
Sondaı-aq ol DNQ saraptamasy salasynda jańa baǵyt engiziletinin aıtty.
– Júktiliktiń jeti aılyq kezeńinde náresteniń ákeligin anyqtaıtyn saraptama júrgizý josparlanyp otyr. Zertteý barysynda ishtegi balaǵa zııan keltirilmeıdi, anasynyń qany arqyly taldaý jasalady, – dedi ortalyq dırektory.
Aıta keteıik, Sot saraptamasy júıesinde endi kompıýterlik tomografııa qoldanylady.
