Qazaqstanda shtab-páteri ornalasqan Network School kompanııasy $2 mlrd baǵalandy
ASTANA. KAZINFORM — Baladjı Shrınıvasan negizin qalaǵan Network School jobasy $2 mlrd baǵamen ınvestıtsııa tartý kezeńine ótti. Shtab-páteri Qazaqstanda ornalasqan kompanııa Astanada tehnologııalyq kampýs ashyp, halyqaralyq mamandar men startaptardy tartýdy josparlap otyr. Bul týraly Jasandy ıntellekt tsıfrlyq damý mınıstrligi málim etti.
Investıtsııalyq kezeń týraly 9 qazanda Jasandy ıntellekt jáne tsıfrlyq damý mınıstri, Qazaqstan Respýblıkasy Premer-mınıstriniń orynbasary Jaslan Mádıev qatysqan Network State Conference 2026 konferentsııasynda jarııalandy.
Bıyl 21 shildede Jasandy ıntellekt jáne tsıfrlyq damý mınıstrligi men Network School arasynda kompanııanyń shtab-páterin Astanaǵa kóshirýdi kózdeıtin memorandýmǵa qol qoıyldy. Bul qadam Qazaqstanǵa jańa jobalardy, kapıtal men komandalardy tartý, sondaı-aq jahandyq naryqqa mamandar daıarlaýǵa múmkindik jasaý baǵytynda halyqaralyq tehnologııalyq kásipkerlermen jáne ınvestorlarmen júrgizilgen jumystyń nátıjesi boldy.
Investıtsııalyq kezeńge jetekshilik etetin kompanııalardyń biri krıptovalıýta salasyndaǵy jetekshi Polychain Capital qory boldy. Qordyń negizin qalaýshy ári bas dırektory Olaf Karlson-Vıdiń habarlaýynsha, raýndqa Andreessen Horowitz venchýrlyq qory, AQSh-taǵy eń iri krıptovalıýta bırjasy Coinbase jáne Baladjı Shrınıvasannyń ózi de qatysady. Jobanyń jarııalanǵan baǵasy 1 mlrd dollardan asatyn jeke kompanııalarǵa beriletin «unicorn» mártebesine sáıkes keledi.
— Biz Andreessen Horowitz, Coinbase jáne Baladjıdiń ózimen birge Network School jobasynyń ınvestıtsııalyq kezeńine jetekshilik etemiz. Bul kezeń aıasynda jobanyń baǵasy 2 mlrd dollardy quraıdy, - dedi Olaf Karlson-Vı.
Network School shtab-páteriniń Qazaqstanda ornalasýy eldiń tehnologııalyq kásipkerlikti tartatyn ortalyq retindegi ornyn nyǵaıtady. Joba bilim berýdi, kásibı qaýymdastyqtardy damytýdy, kompanııalar qurýdy jáne halyqaralyq eńbek naryǵynda jumysqa ornalasýǵa járdemdesýdi biriktiredi.
Baladjı Shrınıvasan sóz sóıleý barysynda Network School qatysýshylarynyń Astanadaǵy jańa qalalyq kampýsqa kóshetinin habarlady. Kampýs Alem.ai halyqaralyq jasandy ıntellekt ortalyǵynda ornalasady. Aldaǵy josparlarǵa elordada tehnologııalyq habty damytý, venchýrlyq ınvestorlar men startaptardy tartý, sondaı-aq Alataýda krıptoqala jobasy boıynsha yntymaqtastyq ornatý kiredi.
— Qazaqstannyń róli qajetti ruqsattar men belgili bir maǵynada tıisti platformany usyný bolsa, bizdiń mindetimiz kapıtal tartý, talanttardy jınaý jáne jobalardy iske asyrý. Osyndaı úılesim óte jaqsy nátıje bere alady, - dep atap ótti Network School negizin qalaýshy.
Shrınıvasan Astananyń damý deńgeıine, qalalyq ortanyń sapasyna jáne elordanyń halyqaralyq tehnologııalyq qaýymdastyqty tartý áleýetine joǵary baǵa berdi.
— Meniń oıymsha, bul kelesi Dýbaı, kelesi Sıngapýr, - dep atap ótti ol.
Yntymaqtastyqtyń negizgi baǵyttarynyń biri bilim berý jáne kadrlar daıarlaý bolmaq. Qazaqstan Respýblıkasy Ǵylym jáne joǵary bilim mınıstrligimen birlesip, Network School bastapqyda onlaın oqytýǵa baǵyttalǵan akademııalyq mekeme qurýdy josparlap otyr. Bolashaqta ony akademııalyq dáreje berý quqyǵy bar tolyqqandy ýnıversıtetke aınaldyrý kózdelgen.
Usynylyp otyrǵan bilim berý modeli meńgerilgen bilim men daǵdylarǵa basymdyq beredi. Oqý baǵdarlamasyn ıgerý qarqyny bilim alýshynyń nátıjelerine baılanysty bolady, al biliktilik deńgeıi qatań talaptar qoıylatyn oflaın emtıhan arqyly rastalady. Sonymen qatar úzdiksiz bilim alý jáne bilim týraly qujattardyń túpnusqalyǵyn tekserý úshin blokcheın tehnologııalaryn paıdalaný qarastyrylǵan.
Shrınıvasannyń aıtýynsha, Qazaqstannyń ulttyq kompanııalarymen birlesken jumys mamandar daıarlaýdy olardyń keıin jumysqa ornalasýymen baılanystyrýǵa múmkindik beredi. Ol bul tásildi «emtıhan tapsyr da, jumysqa ornalas» qaǵıdaty retinde sıpattady.
Halyqaralyq mamandardy tartýmen qatar, qazaqstandyqtar úshin de jańa múmkindikter ashylady. Network School negizin qalaýshy aldymen Qazaqstanǵa myńdaǵan, al bolashaqta ondaǵan myń maman tartý josparyn atap ótti.
— Biz Qazaqstanǵa aldymen myńdaǵan, keıin ondaǵan myń talantty adamdy ákelgimiz keledi. Sonymen qatar qazaqstandyqtardyń jahandyq eńbek naryǵynda jumysqa ornalasýyna kómektesemiz, - dedi ol.
Shrınıvasan sondaı-aq álemde tehnologııalyq kompanııalar men olardyń komandalarynyń bir elden ekinshisine kóshýiniń jańa tolqyny bastalyp jatqanyn atap ótti. Mundaı jaǵdaıda Qazaqstan bıznesti uzaq merzimdi damytýǵa qolaıly alań izdeıtin kásipkerlerdi tartýǵa múmkindik alady.
Network School jobasynyń Qazaqstanda damýy eldi Eýrazııadaǵy jasandy ıntellekt habyna aınaldyrý mindetine saı keledi. Baǵasy 2 mlrd dollar dep jarııalanǵan halyqaralyq jobanyń elde ornalasýy kapıtal men kásibı quzyretterdi tartýǵa, bilikti jumys oryndaryn ashýǵa jáne Qazaqstannan jahandyq naryqqa jumys isteıtin kompanııalardy qurýǵa jańa múmkindikter beredi.
