Qazaqstanda shomylý maýsymy aıaqtaldy

ASTANA. QazAqparat – Elimizde sýǵa túsý maýsymy resmı túrde úsh aıǵa sozylady – 1 maýsymnan 31 tamyzǵa deıin, dep habarlaıdy QazAqparat.

Tótenshe jaǵdaılar mınıstrliginiń málimetinshe, jaz mezgilinde vedomstvonyń qutqarýshylary sýdan 136 adamdy qutqardy, onyń 51-i – balalar. 177 adam sýǵa batyp ketti, onyń ishinde 53-i – kámeletke tolmaǵandar. Ótken 2022 jylǵy shomylý maýsymynda sý aıdyndarynda 184 adam kóz jumsa, (-4%), sonyń ishinde 62-si – kámeletke tolmaǵandar (-15%).

«Sýǵa batqandardyń 98 paıyzy jabdyqtalmaǵan jaǵajaılarda shomylǵan. Sýdaǵy ólimniń negizgi sebepteri – óz kúshterin asyra baǵalaý, mas kúıde shomylý, júze almaý. Al balalardyń sýǵa ketýiniń basty sebebi – eresekterdiń olardy qaraýsyz qaldyrýy», - deıdi TJM resmı ókili Janna Dáýrenbekova.

Aıta keteıik, jalpy respýblıka boıynsha shomylýǵa ruqsat etilgen 612 oryn bar. 4285 oryn sýǵa túsýge qaýipti dep tanylyp, demalysqa tyıym salynǵan oryndar tizimine engizilgen.

Tyıym salynǵan jáne ruqsat etilgen shomylý aımaqtary týraly derekter 2GIS platformasynda ornalastyrylǵan.