Qazaqstanda ShOB sýbektilerin jeńildikpen kredıtteý baǵdarlamasy ázirlendi
ALMATY. QazAqparat – QR Prezıdentiniń tapsyrmasy boıynsha Ulttyq bank Qarjy naryǵyn retteý men damytý agenttigimen birlesip shaǵyn jáne orta kásipkerlik sýbektilerin jeńildikpen kredıtteý baǵdarlamasyn ázirledi. Bul týraly atalǵan agenttik tóraǵasynyń birinshi orynbasary Oleg Smolıakov brıfıng barysynda aıtty.
«Baǵdarlama ekinshi deńgeıdegi bankterdiń tótenshe jaǵdaı engizý saldarynan zardap shekken ShOB sýbektilerine, onyń ishinde jeke kásipkerlerge aınalym kapıtalyn tolyqtyrýǵa 12 aıǵa 8%-ben jeńildetilgen kredıt berýi arqyly iske asyrylýda. Aktıvteriniń sapasyn táýelsiz baǵalaýdan (AQR) ótken jáne portfelinde ShOB qaryzdary bar 13 qatysýshy bank aıqyndaldy», – dedi Smolıakov.
Baǵdarlamaǵa qatysýshy bankterge bólingen qarajatty memlekettik jáne memlekettik emes baǵaly qaǵazdardy satyp alý, basqa bankterdegi depozıtterge ornalastyrý, shetel valıýtasyn satyp alý úshin paıdalanýǵa tyıym salynǵan.
«Osy jyldyń 14 sáýirdegi jaǵdaı boıynsha, ıaǵnı baǵdarlama iske asyrylǵan sátten bastap 12 kún ishinde shaǵyn jáne orta bıznes sýbektilerinen 213,9 mlrd teńge somaǵa 1 131 ótinim tústi, onyń ishinde 41,7 mlrd teńgege 92 ótinim maquldandy. Qaryz alýshylardyń qarjylandyrýdy alý merzimderin qysqartý úshin bankterdiń baǵdarlama boıynsha qarjylandyrýǵa ótinimderin kelisýdiń ońtaıly tetigi ázirlendi, – dedi ol.
Sonymen qatar, ol tótenshe jaǵdaı rejımin engizý nátıjesinde zardap shekken halyqty, shaǵyn jáne orta bıznesti qoldaý maqsatynda Agenttik birqatar jedel shara qabyldaǵanyn jetkizdi.
«Barlyq qaryz (mıkrokredıt) boıynsha tólemderdiń merzimi ótip ketkeni úshin aıyppuldar men ósimpuldar esepteýge tyıym salyndy, sondaı-aq tólemder merziminiń ótip ketýi kúntizbelik 90 kúnnen asatyn jeke tulǵalardyń kepilsiz tutynýshylyq qaryzdary boıynsha syıaqy esepteýge tyıym salyndy. 2020 jylǵy 16 naýryz – 15 maýsym aralyǵyndaǵy kezeńde banktik qaryz jáne mıkrokredıt sharttary boıynsha tólemderdiń merzimin keıinge qaldyrý arqyly jeke jáne zańdy tulǵalarǵa negizgi borysh pen syıaqy tóleý toqtatyla turdy», –dedi agenttik ókili.
Bul talaptar barlyq ekinshi deńgeıdegi bankterge, lombardtardy qosqanda, mıkroqarjylyq qyzmetti júzege asyratyn uıymdarǵa, onlaın-kredıt berý kompanııalaryna, kredıttik seriktestikterge qoldanylady.
Tólemderdi keıinge qaldyrý ruqsaty jeke tulǵalarǵa, halyqtyń áleýmettik osal toptaryna, ataýly áleýmettik kómek alýshylarǵa, tirkelgen jumyssyzdarǵa, qarjylyq qıyn jaǵdaıdaǵy ózge azamattarǵa beriledi.
«Búgingi kúni 4,4 trln teńge somaǵa 5,3 mln jýyq azamattyń jáne 3,9 trln teńge somaǵa 26,2 myńǵa tarta shaǵyn jáne orta bıznes sýbektileriniń banktik qaryzdary jáne mıkrokredıtter boıynsha bereshekteri bar. 14 sáýirdegi jaǵdaı boıynsha 1,5 mln qaryz alýshy jáne 12,1 myń shaǵyn jáne orta kásipkerlik sýbektisi qaryzdar boıynsha tólem merzimin keıinge qaldyrýǵa ótinimderin berdi», - dedi Smolıakov.
Sonymen qatar, ol 186,1 mlrd teńge somasyna 1 340 707 adam jáne 131,4 mlrd teńgege 9 822 ShOB sýbektisi tólem merzimin keıinge qaldyrý múmkindigine ıe bolǵanyn tilge tıek etti.
