Qazaqstanda ShOB-qa jeńildikpen nesıe berý múmkindigi aıtarlyqtaı keńeıdi
NUR-SULTAN. QazAqparat – Qazaqstanda shaǵyn jáne orta bızneske jeńildikpen nesıe berý múmkindigi aıtarlyqtaı keńeıtildi, dep habarlaıdy QazAqparat tilshisi.
«Jalpy nesıeleý kólemi 1 trln teńgege ulǵaıtyldy. Bul - «Qarapaıym zattar ekonomıkasy» baǵdarlamasy boıynsha qosymsha 400 mlrd teńge jáne Ulttyq bank jelisi boıynsha jańa 600 mlrd teńgelik soma. «Bıznestiń jol kartasy» jáne «Qarapaıym zattar ekonomıkasy» baǵdarlamalary boıynsha salalardy qamtý aıtarlyqtaı keńeıtildi. Qaryz alýshylar úshin sońǵy mólsherleme 6%-dy quraıdy», - dedi Ulttyq ekonomıka mınıstri Rýslan Dálenov OKQ-da ótip jatqan baspasóz máslıhatynda.
Onyń aıtýynsha jyl basynan beri «Bıznestiń jol kartasy - 2025» baǵdarlamasy boıynsha 112 mlrd teńge somasyna 1700-den astam joba qarjylandyrylǵan. «Eńbek» memlekettik baǵdarlamasy boıynsha 5 216 joba iske asyrylyp, 22,9 mlrd teńgege nesıe berilgen.
«Qarapaıym zattar ekonomıkasy» baǵdarlamasy boıynsha jyl basynan beri 382 mlrd teńgeden astam somaǵa shamamen 1500 joba qarjylandyryldy», - dedi ol.
