Qazaqstanda shıpajaılarǵa «juldyzdar» berilmek
Bul jaıynda Qazaqstannyń ulttyq shıpajaılar qaýymdastyǵynyń prezıdenti Saıagúl Qaıyrgeldına málim etti, dep habarlaıdy QazAqparat.
«Qazaqstan respýblıkasynyń shıpajaılar qorynyń ulttyq tizilimin jasaýdy aıaqtap, ony qazaqstandyq shıpajaılar bazasynda saýyǵý múmkinshiligi týraly qoljetimdi aqparattarmen qamtamasyz etý úshin shynaıy jumys tetigine aınaldyrý qajet. Sonymen qatar shıpajaı nysandarynyń mindetti jiktemesin bekitip, medıtsınalyq qyzmet deńgeıi men ornalasý jaılylyǵy boıynsha sanattarǵa bólý kerek. (...)
Shıpajaı uıymdarynyń «juldyzy», sertıfıkaty, akkredıtatsııasy men attestatsııasy boıynsha da jumys júrgizbek oıymyzda bar.Óıtkeni, qazirgi tańda bul salamen, shıpajaı baǵytymen aınalysatyn organ joq», - dedi Saıagúl Qaıyrgeldına búgin «Shıpajaı-2017» ǵylymı-tájirıbelik konferentsııasy barysynda.
Degenmen, onyń aıtýynsha, Qazaqstannyń ulttyq shıpajaılar qaýymdastyǵy shıpajaılarǵa «juldyz» berýmen aınalyspaıdy. Onyń sózine qaraǵanda, shıpajaı uıymdary medıtsınalyq mekemeler sekildi attestatsııadan ótýi tıis. Bul shıpajaıdyń medıtsına qyzmetkerlerine ǵana emes sonymen birge atalǵan uıymdardyń top-menedjerlerine de qatysty. Munan bólek, qaýymdastyq Qazaqstannyń shıpajaı uıymdarynyń pasporttalýyn qalyptastyrý boıynsha da qujattar ázirlemek.
«Shıpajaılyq emdeýge qatysy bar keshenderdiń barlyq nysandaryn basqarýdyń biryńǵaı júıesin qurý qajet. ıAǵnı, shıpajaılardy basqarýdyń ortalyqtandyrylǵan júıesin qurǵan jón», - dedi qaýymdastyq prezıdenti.
Aıta keteıik, búgingi tańda Qazaqstanda 200-den astam shıpajaı bar.
