Qazaqstanda shilde aıynda órt qaýpi órshı túsedi - TJK
ASTANA. QazAqparat - Qazaqstanda shilde aıynda órt qaýpi órshı túsedi. Osyǵan baılanysty TJK jurtshylyqty qaýipsizdik erejelerin qatań saqtaýǵa shaqyrady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Іshki ister mınıstrligi Tótenshe jaǵdaılar komıtetiniń tóraǵasy Vladımır Bekker málim etti.
Komıtet tóraǵasynyń aıtýynsha, órt qaýpiniń órshıtin maýsymynda TJK ishki ister organdarymen, jergilikti polıtsııa qyzmetimen birlese otyryp, reıdterge shyǵýdy, orman jáne dala aýmaqtaryn órtten qorǵaý sharalaryn júrgizýdi qolǵa alyp keledi. Mundaı reıdtik sharalar arqasynda jedel toptardyń birlesken sharasy arqyly aýyl sharýashylyǵy dalalarynda qurǵaq shópke ruqsatsyz órt qoıýdyń 40 faktisi tirkelgen. Ásirese Aqmola, Jambyl, Batys Qazaqstan, Pavlodar jáne Qostanaı oblystarynyń dala massıvterinde órt qaýipsizdigin saqtamaý jıi oryn alyp otyr.
«Qazgıdromet» mekemesiniń málimetine qaraǵanda, Qazaqstan aýmaǵynda ystyq aýa maýsymy, ásirese, shilde aıyna dóp keledi. Onda aýa temperatýrasy + 30ºS bolady dep boljanyp otyr. Osy aralyqta elimizdiń batys jáne ońtústik aımaqtarynda jaýyn-shashyn bolmaı, qurǵaqshylyq oryn alatyny belgili. Sondyqtan da, osy kezeńde respýblıka boıynsha órt qaýipsizdigi órshı túsedi. Osyny eskere otyryp, respýblıka jurtshylyǵyn órt qaýipsizdigi erejeleri men talaptaryn qatań saqtaýǵa shaqyramyz», - dedi V. Bekker.
Onyń sózine qaraǵanda, tabıǵı dala órtteri men eldi mekenderdegi órtterge jedel den qoıý maqsatynda jergilikti atqarýshy organdarmen birlesken 4367 erikti órtke qarsy qurylymdar jasaqtalǵan. Olarǵa 7621 birlik tehnıka, sonyń ishinde 348 órt avtomashınalary, 7273 arnaıy jabdyqtalǵan tehnıkalr berildi. Jalpy órtke qarsy erikti qurylymnyń jeke quramynda 48 201 adam bar.
