Qazaqstanda shıkizattyq emes baǵyttaǵy eksporttyń qurylymy ózgermedi

ASTANA. QazAqparat - 2016 jyly Qazaqstannyń shıkizattyq emes baǵytyna qaraı eksporttyń qurylymy ózgergen joq. Bul óz kezeginde elimizde ekonomıkany ártaraptandyrý boıynsha qoıylǵan maqsattarǵa qol jetkizilmeýdiń táýekelderin týyndatady. Bul jaıynda QR Parlamenti Májilisinde 2016 jylǵa respýblıkalyq bıýdjettiń atqarylýy týraly baıandamasynda Esep komıtetiniń tóraǵasy Nurmuhambet Ábdibekov málim etti, dep habarlaıdy QazAqparat.

Onyń sózine qaraǵanda, álemdik taýarlyq naryqtarda qolaısyz konıýnktýra, óndirister kóleminiń qysqarýy Ulttyq qorǵa túsimderdiń qysqarýyna alyp keldi.

«Shoǵyrlandyrylǵan bıýdjettiń túsimderinde shıkizattyq sektordyń úlesi aıtarlyqtaı qysqardy. Eksport qurylymynyń shıkizattyq emes bóligine qaraı ózgerýi oryn alǵan joq, bul óz kezeginde ekonomıkany ártaraptandyrý boıynsha maqsattar men mindetterge qol jetkize almaý táýekelderin qurýda»,-dep toqtaldy Ábdibekov.

Sonymen qatar ol ekinshi deńgeıli banktermen naqty sektorǵa baǵyttaıtyn uzaq merzimdi qarjylandyrý kólemi azaıǵanyn jetkizdi. Respýblıkalyq bıýdjet kiristeriniń Ulttyq qordan beriletin transfertterge táýeldiliginiń saqtalýy atap kórsetildi.

«Esep komıteti baǵalaýy boıynsha respýblıkalyq bıýdjettiń naqtylanǵan parametrleri shyn máninde oryndaldy. Bıýdjettiń oryndalýy turǵysynda Úkimet tarapynan qabyldanǵan sheshimderdi túzetýdiń júıeli qadamynyń bolmaý máselesi ashyq kúıinde qalyp otyr. Úkimettiń tıisti qaýlysy jyl barysynda 31 ret ózgertýge ushyrady, onyń 81 paıyzy ekinshi jartyjyldyqqa tıesili»,-dedi Ábdibekov.