Qazaqstanda shyǵarylǵan avtokólikterge qosymsha jeńildikter jasalýy múmkin
ASTANA. KAZINFORM — Qazaqstanda óndirilgen avtokólikterdiń baǵasy tómendep keledi. Qarasha jáne jeltoqsan aılarynda óndirýshiler tarapynan qosymsha jeńildikter usynylýy múmkin. Bul týraly QR Ónerkásip jáne qurylys mınıstri Ersaıyn Naǵaspaev Úkimettegi brıfıngte aıtty.
Mınıstrdiń aıtýynsha, sońǵy birneshe aıda Qazaqstanda shyǵarylǵan avtokólikterdiń baǵasy shamamen 11 paıyzǵa tómendegen.
— Elimizde óndirilgen avtokólikterdiń baǵasy arzandap jatyr. Meniń bilýimshe, sońǵy aılarda baǵa shamamen 11 paıyzǵa tómendedi. Qazir avtokólikterdiń baǵasy burnǵydan shamamen 10 paıyzǵa arzan, oǵan qosa túrli aktsııalar da bar, — dedi Ersaıyn Naǵaspaev.
Sondaı-aq mınıstr jyl sońyna deıin avtokólik óndirýshileri qosymsha jeńildikter usynýy múmkin ekenin aıtty.
— Jyl sońyna jaqyndaǵan saıyn bıyl shyǵarylǵan modelder eskire bastaıdy, ıaǵnı, tutynýshylar 2027 jylǵy kólikterdi satyp alýǵa tyrysady. Qazir qarasha, jeltoqsan aılary jaqyndap keledi. Sondyqtan jeńildikter bolatyny túsinikti. Menińshe, baǵalar áli de tómendeıdi, — dedi mınıstr.
Sonymen qatar Naǵaspaev Qazaqstanda avtokólik óndirisin ulǵaıtý josparlary týraly da aıtty. Byltyr elimizde 71 myń avtokólik shyǵarylsa, bıyl 191 myń avtokólik óndirý josparlanyp otyr.
Atap aıtqanda, Almaty oblysynda jylyna 70 myń avtokólik shyǵarýǵa qaýqarly Kia zaýyty iske qosyldy. Sonymen qatar Almaty qalasynda jylyna 120 myńǵa deıin avtokólik óndirýge arnalǵan kópbrendti zaýyt jumys istep tur.
Buǵan deıin Almatyda árbir jetinshi kóliktiń zııandy shyǵaryndylary normadan asqanyn jazǵanbyz.
