Qazaqstanda sheteldikterge arnalǵan suranysqa ıe mamandyqtar tizimi keńeıtiledi
ASTANA. KAZINFORM — Qazaqstanda shetel azamattarynyń turaqty turýǵa ruqsat alýy úshin suranysqa ıe kásipter tizbesi aıtarlyqtaı keńeıtilmek. Bul týraly Eńbek jáne halyqty áleýmettik qorǵaý mınıstrligi ázirlegen buıryq jobasy «Ashyq NQA» portalyna jarııalandy.
Joba elimizge ekonomıkanyń basym salalarynda suranysqa ıe bilikti sheteldik mamandardy tartý úshin jaǵdaı jasaýǵa baǵyttalǵan.
— Jobada Qazaqstan Respýblıkasynda turaqty turýǵa ruqsat alý úshin shetel azamattaryna suranysqa ıe kásipter tizbesin ulttyq ekonomıkanyń qajettilikteri men basym salalardy eskere otyryp, 51 kásipten 174 kásipke deıin keńeıtý kózdeledi, — delingen qujatta.
Kútiletin nátıje — ekonomıkanyń basym salalaryna joǵary bilikti sheteldik mamandardy tartý úshin suranysqa ıe kásipter tizbesin keńeıtý. Іske asyrý merzimi Eńbek jáne halyqty áleýmettik qorǵaý mınıstriniń buıryǵy qabyldanǵannan keıin belgilenedi.
Aıta keteıik, buıryq jobasy birqatar joǵary deńgeıdegi qujatty iske asyrý maqsatynda ázirlendi. Atap aıtqanda:
— Qazaqstan Respýblıkasy Prezıdentiniń 2025 jylǵy 13 qazandaǵy № 1042 Jarlyǵymen bekitilgen Jalpyulttyq is-sharalar josparynyń 85-tarmaǵy;
— Memleket basshysynyń 2026 jylǵy 25 sáýirdegi № 1242 «Joǵary bilikti mamandardy, sheteldik ınvestorlardy jáne kásipkerlerdi tartý úshin qolaıly jaǵdaılar jasaý maqsatynda kóshi-qon saıasatyn jetildirý jónindegi sharalar týraly» Jarlyǵynyń tıisti tarmaqshasy;
— Qazaqstan Respýblıkasynyń 2030 jylǵa deıingi kóshi-qon saıasaty tujyrymdamasyn iske asyrý jónindegi is-qımyl josparynyń 33-tarmaǵy.
Jobany talqylaý 2026 jylǵy 6 qazanǵa deıin jalǵasady.
Buǵan deıin Qazaqstanda sheteldik mamandardy otandyq kadrlarmen almastyrý baǵdarlamasy ázirlenetinin jazǵanbyz.
