Qazaqstanda sheteldik júrgizýshilerdi jazalaıtyn amal tabyldy
ASTANA. KAZINFORM – Jetisý oblysynda Qazaqstan aýmaǵynda jol qozǵalysy erejelerin buzǵan sheteldik memlekettik tirkeýdegi avtokólik júrgizýshilerin ákimshilik jaýapkershilikke tartýdyń jańa tetigi engizildi.
Buǵan deıin sheteldik tirkeýdegi kólik ıelerin anyqtap, olarǵa ákimshilik aıyppul týraly nusqama tabystaý qıyn bolǵandyqtan, kóptegen quqyq buzýshy el aýmaǵynan jaýapkershilikke tartylmaı shyǵyp ketetin.
– Oblys prokýratýrasynyń bastamasymen múddeli memlekettik organdar arasynda aqparat almasý jolǵa qoıylyp, ózara is-qımyldyń biryńǵaı tártibi engizildi. Endi quqyq buzýshylyq anyqtalǵannan keıin kólik ıesi anyqtalyp, aıyppul týraly nusqama rásimdeledi. Memlekettik shekarany qaıta kesip ótken kezde ol quqyq buzýshyǵa tabystalyp, tólenbegen aıyppul bolsa, polıtsııa qyzmetkerleri ony óndirip alý sharalaryn qabyldaıdy, – delingen Bas prokýratýra habarlamasynda.
Jańa tetiktiń nátıjesinde sheteldik memlekettik tirkeýdegi avtokólikterdiń 400-den astam ıesi belgilengen jyldamdyqty asyrǵany úshin ákimshilik jaýapkershilikke tartyldy. Salynǵan aıyppuldardyń jalpy somasy 28 mln teńgeni qurady. Qazirgi ýaqytta 33 kólik ıesinen 1 mln teńgeden astam aıyppul óndirilgen.
– Qazirgi tańda memlekettik aqparattyq júıelerdi ıntegratsııalaý jumystary jalǵasyp jatyr. Bul vedomstvoaralyq ózara is-qımyldyń tıimdiligin arttyryp, zań buzǵandardyń jaýapkershilikten jaltarýyna jol bermeýge múmkindik beredi, – dep málimdedi Jetisý oblysynyń prokýratýrasy.
Aıta keteıik, maýsym aıynda 167,8 myń avtokólik esepke qoıyldy.
