Qazaqstanda sheteldik jumys kúshin tartý tártibin jetildirý máselesi talqylandy
ASTANA. KAZINFORM – QR Eńbek jáne halyqty áleýmettik qorǵaý mınıstrliginde Prezıdent janyndaǵy Sheteldik ınvestorlar keńesiniń Jumys toby teń tóraǵalarynyń jumys kezdesýi ótti, dep habarlaıdy mınıstrliktiń baspasóz qyzmeti.
Jıynda sheteldik jumys kúshin tartý tártibin jetildirý, joǵary bilikti mamandarǵa, ınvestorlar men kásipkerlerge vızalyq qoldaý kórsetý, sondaı-aq eńbek zańnamasyna josparlanyp otyrǵan ózgerister talqylandy.
Kezdesý Jumys tobynyń sheteldik taraptan jańa teń tóraǵasy – «Er Lıkıd Mýnaı Teh Gazy» JShS bas dırektory Gabrıel Konstantındi tanystyrýǵa oraı uıymdastyryldy. Qazaqstan tarapynan jıynǵa Eńbek jáne halyqty áleýmettik qorǵaý mınıstri Asqarbek Ertaev qatysty.
Taraptar eńbek, jumyspen qamtý jáne kóshi-qon salalaryndaǵy qoldanystaǵy bastamalar men reformalardy, sondaı-aq Jumys toby aıasyndaǵy aldaǵy ózara is-qımyl máselelerin qarady.
Atap aıtqanda, sheteldik jumys kúshin tartý tártibin jetildirýge baǵyttalǵan zańnamalyq bastamalar sóz boldy. Sonymen qatar joǵary bilikti sheteldik mamandarǵa, ınvestorlar men kásipkerlerge vızalyq qoldaý kórsetý máseleleri nazarǵa alyndy.
Budan bólek, eńbek zańnamasyna engizý josparlanyp otyrǵan ózgerister men tálimgerlik ınstıtýtyn retteý máselesine erekshe nazar aýdaryldy.
Taraptar zańnamalyq bastamalardy talqylaý kezinde memlekettik organdar men sheteldik bıznes ókilderi arasyndaǵy turaqty dıalogtiń mańyzdylyǵyn atap ótti.
Kezdesý qorytyndysy boıynsha qatysýshylar eńbek jáne kóshi-qon zańnamasyn jetildirý baǵytyndaǵy birlesken jumysty jalǵastyrýǵa daıyn ekenderin bildirdi. Bul jumys ınvestıtsııalyq ahýaldy jaqsartýǵa jáne Qazaqstan ekonomıkasynyń ornyqty damýyn qamtamasyz etýge baǵyttalǵan.
