Qazaqstanda sheteldik mamandardy tartýdyń jańa tetikteri ázirlendi
ASTANA. KAZINFORM — Qazaqstan joǵary bilikti sheteldik mamandardy tartýdyń jańa tetikterin iske qosyp jatyr, dep habarlaıdy Eńbek jáne halyqty áleýmettik qorǵaý mınıstrliginiń baspasóz qyzmeti.
Tıisti sharalar eldiń bilikti mamandar, ınvestorlar men kásipkerler úshin ashyqtyǵyn arttyrýǵa baǵyttalǵan Qazaqstan Respýblıkasy Prezıdentiniń Jarlyǵy aıasynda júzege asyrylady.
— Eńbek jáne halyqty áleýmettik qorǵaý mınıstrligi kóshi-qon zańnamasyn keshendi jańartýdy kózdeıtin zań jobasyn ázirledi. Qujat eńbek naryǵynyń naqty qajettilikterin eskere otyryp, suranysqa ıe mamandardy maqsatty túrde tartý tetigin engizedi. Negizgi jańashyldyqtardyń biri — Úkimet bekitetin basym mamandyqtar tizbesin qalyptastyrý. Oǵan qazirgi ýaqytta kadr tapshylyǵy aıqyn baıqalatyn aqparattyq tehnologııalar, densaýlyq saqtaý, bilim berý jáne mádenıet salalaryndaǵy mamandar engiziledi dep kútiledi, — delingen habarlamada.
Zań jobasy sondaı-aq jumys berýshilerdiń shaqyrýy boıynsha sheteldik mamandardy tartýdyń ashyq ári túsinikti sharttaryn aıqyndaıdy.
Budan bólek, Qazaqstanda jumys isteý jáne ómir súrý úshin básekege qabiletti jaǵdaılar qalyptastyrýǵa erekshe nazar aýdarylǵan. Atap aıtqanda, «Altyn Visa» baǵdarlamasynyń múmkindikteri keńeıtiledi. Sheteldik mamandar belgilengen eńbek ótilinen keıin uzaq merzimdi rezıdent mártebesin (Resident ID) alýǵa úmitker bola alady.
Bul mártebe birqatar mańyzdy artyqshylyqqa jol ashady. Olardyń qatarynda salyqtyq jeńildikter, qarjylyq qyzmetterge qol jetkizý, densaýlyq saqtaý men bilim berý salalaryndaǵy keńeıtilgen múmkindikter, sondaı-aq kvotalyq shekteýlersiz jumys isteý quqyǵy bar.
Atalǵan normalardy iske asyrý, eń aldymen, sheteldik mamandardy tartý arqyly qazaqstandyq kadrlarǵa bilim men tájirıbe berýdi qamtamasyz etedi. Sonymen qatar bul sharalar kadr tapshylyǵyn azaıtýǵa, tehnologııalyq damýdy jedeldetýge, eńbek ónimdiligin arttyrýǵa jáne jalpy ekonomıkalyq ósimge oń áser etýge múmkindik beredi.
Uzaq merzimdi perspektıvada mundaı qadamdar Qazaqstannyń bilikti mamandar men ozyq tehnologııalardy tartatyn óńirlik ortalyqqa aınalýyna yqpal etýi múmkin.
— Qazir zań jobasy memlekettik organdar arasynda kelisý rásiminen ótip jatyr. Sonymen qatar Eńbek jáne halyqty áleýmettik qorǵaý mınıstrligi suranysqa ıe mamandyqtar tizbesin 51-den 174-ke deıin keńeıtý baǵytynda jumys júrgizedi. Atalǵan tizbe Qazaqstan Respýblıkasy Úkimetiniń qaýlysymen bekitiletin bolady. Tizimge atom ónerkásibi, energetıka, bıotehnologııa jáne genomdyq medıtsına, densaýlyq saqtaý, ıadrolyq energetıka, sý resýrstary men ırrıgatsııa sııaqty salalardaǵy mamandyqtar engiziledi, — delingen habarlamada.
Qabyldanatyn sharalar Qazaqstannyń jahandyq deńgeıde bilikti úshin básekedegi pozıtsııasyn nyǵaıtyp, ekonomıkanyń negizgi salalaryna bilikti mamandar aǵynyn qamtamasyz etedi dep kútiledi.
Osydan buryn Eńbek mınıstrligi bıyl ınklıýzıvti jumyspen qamtý múmkindigi keńeıtiletinin alǵa tartty.
