Qazaqstanda sheteldik ınvestorlarǵa arnalǵan «Altyn vıza» engiziledi

Kóshi-qon komıtetiniń tóraǵasy Eldar Kúzenbaev kóshi-qon zańnamasyn jańǵyrtý máseleleri boıynsha jumys kezdesýin ótkizdi. Talqylaýǵa Otandastar qorynyń ókilderi qatysty.

Kezdesýdiń negizgi taqyryby Qazaqstannyń kóshi-qon saıasatyn keshendi jetildirý máselesi boldy. Qatysýshylar sheteldik kapıtal tartý tetikterin jańǵyrtý, joǵary bilikti sheteldik mamandar, ınvestorlar men kásipkerler úshin elge kelý jáne uzaq merzimdi eńbek qyzmetin júzege asyrýǵa qolaıly jaǵdaı jasaý máselelerin jan-jaqty talqylady.

Eldar Kúzenbaev Memleket basshysynyń tapsyrmasyna sáıkes Qazaqstanda servıstik tásilge negizdelgen kóshi-qon aǵyndaryn retteýdiń jańa ári básekege qabiletti modeli qalyptasyp jatqanyn atap ótti.

— Negizgi quraldardyń biri retinde «Altyn vıza» ınstıtýty engiziledi. Ol ınvestıtsııalyq jáne joǵary bilikti rezıdenttik júıeni qamtyp, sheteldik ınvestorlar men suranysqa ıe mamandar úshin birqatar artyqshylyqtar usynady. Bul tetik ekonomıkanyń damýyna qajetti ınvestorlar men tapshy kadrlardyń quqyqtyq mártebesin uzaq merzimge bekitýge baǵyttalǵan. «Altyn vıza» olardyń Qazaqstanda jumys isteýi men qyzmet júrgizýin edáýir jeńildetetin keń múmkindikter paketin usynady, — dedi komıtet tóraǵasy.

Kezdesý barysynda kóshi-qon úderisterin tehnologııalyq jańǵyrtý máselesine erekshe nazar aýdaryldy. Servıstik modelge kóshý kóshi-qon qyzmetterin tereń tsıfrlandyrý arqyly júzege asyrylady. Reforma jobasy aıasynda tsıfrlyq rezıdent qujatyn engizý jáne e-Resident modýlimen jabdyqtalǵan arnaıy QazETA platformasyn tolyq iske qosý josparlanǵan.

«Otandastar qory» KeAQ shetelde keshendi aqparattyq-túsindirý jumystaryn júrgizetin negizgi operator retinde belgilendi. Sonymen qatar qorǵa «Altyn vıza» alýǵa nıet bildirgen tulǵalardyń ózekti tizimin qalyptastyrý jáne júrgizý mindeti júkteldi.