Qazaqstanda sheteldik ınvestorlar qandaı jańa zaýyttar salyp jatyr
ASTANA.KAZINFORM — Premer-Mınıstr Oljas Bektenov KGIR-2025 jahandyq ınvestıtsııalar jónindegi dóńgelek ústelde elimizde óz jobalaryn júzege asyryp jatqan álemdik kompanııalar týraly aıtyp berdi.
Úkimet basshysy Qazaqstan uzaqmerzimdi ınvestıtsııalar úshin ashyq memleket bolyp qala beredi. Investorlarmen senimdi dıalog ornatý – eldiń ınvestıtsııalyq saıasatynyń ajyramas bóligi.
— Osy turǵyda ózara tıimdi yntymaqtastyǵymyzdyń naqty mysaldaryn keltirsem deımin. Búgin aramyzda Fufeng Group dırektorlar keńesiniń tóraǵasy myrza Lı Sıýechýn otyr. Dál bir jyl buryn, 7-dóńgelek ústelde biz júgerini tereń óńdeý boıynsha agropark qurý jobasy týraly kelisimge keldik. Bar bolǵany birneshe aıdan keıin kompanııa qurylysty bastap ketti, jaqyn ýaqytta kásiporyn iske qosylady, — dedi Premer-Mınıstr.
Sonymen birge, O.Bektenov PepsiCo kompanııasymen strategııalyq áriptestikti erekshe atap ótti.
— Ótken jyldyń jazynda biz Davıd Manzını myrzamen (PepsiCo kompanııasynyń Reseı, Belarýs, Kavkaz jáne Ortalyq Azııa óńirleri boıynsha prezıdenti) Almaty oblysynda tuzdy tiskebasarlar shyǵaratyn zaýyt salý perspektıvasyn talqyladyq. Qazirgi ýaqytta joba qarqyndy iske asyrylýda jáne kelesi jyldyń basynda kásiporyn iske qosylady, — dedi O.Bektenov.
Premer-Mınıstr sondaı-aq Dalian Hesheng Holding Group dırektorlar keńesi tóraǵasynyń orynbasary ıÝı ıÝıfeıge yqylas kórsetti jáne kompanııanyń bıdaıdy tereń óńdeıtin zaýyt qurylysyn bastap ketkenin atap ótti.
— Munda ıspandyq Roca Group kompanııasynyń aımaqtyq prezıdenti Ernandes myrza da qatysyp otyr. Keshe ǵana Prezıdent Qasym-Jomart Toqaev Roca Group kompanııasynyń zamanaýı sanıtarlyq tehnıka óndirý bastamalarymen tanysty. Jańa kásiporyn eksportqa baǵyttalǵan joǵary sapaly ónim shyǵarmaq. Investor jaqyn ýaqytta osy biregeı jobanyń qurylysyn bastaıdy, — dedi ol.
Úkimet basshysy sondaı-aq Lihua Group kompanııasy Túrkistan oblysyndaǵy TURAN arnaıy ekonomıkalyq aımaǵynda maqta-toqyma klasterin qurý jobasyn bastaǵanyn habarlady.
— Sheteldik ınvestorlardyń qatysýymen júzege asqan iri jobalardyń biri — jýyrda ashylǵan KIA Qazaqstan avtomobıl zaýyty. Mundaı aýqymdy jobany KIA korporatsııasy nebári eki jylda iske asyrdy, bul bizdiń yntymaqtastyǵymyzdyń joǵary deńgeıi men sapasyn kórsetedi. Kórip otyrǵandaryńyzdaı, men ataǵan jobalar elimizde qol jetkizilgen kelisimderdiń naqty óndiristik nysandarǵa aınalyp jatqanyn aıqyn dáleldeıdi. Barshańyzdy Qazaqstandaǵy bıznes múmkindikterin tolyq paıdalanýǵa shaqyramyn. Biz jobalardy iske asyrýdyń barlyq kezeńinde jan-jaqty qoldaý kórsetýge daıynbyz, — dep túıindedi O.Bektenov.
Aıta keteıik, Qazaqstan Shyǵys pen Batys arasyndaǵy geosaıası jáne geoekonomıkalyq kópir bolyp, kólik pen energetıka salasyndaǵy jańa dálizderdiń negizgi torabyna aınaldy.
Buǵan deıin «Astana» halyqaralyq qarjy ortalyǵynyń basqarýshysy Renat Bekturov elimizdiń taý-ken salasyna qandaı ınvestorlar kelip jatqanyn aıtty.