Qazaqstanda sheteldik dropperler arqyly jumys istegen onlaın-kazınonyń qyzmeti toqtatyldy
ASTANA. KAZINFORM — Qarjylyq monıtorıng agenttiginiń Soltústik Qazaqstan oblysy boıynsha departamenti el aýmaǵynda jumys istegen iri «Nomad Poker» atty onlaın-kazınonyń zańsyz qyzmetin toqtatty.
Vedomstvonyń habarlaýynsha, tergeý barysynda «Club GG Poker» mobıldi platformasy negizinde qurylǵan «Nomad Poker» onlaın-kazınosynyń qyzmetin Qazaqstan azamattary Grýzııa aýmaǵynan júrgizip otyrǵany anyqtaldy.
— Mundaı shema uıymdastyrýshylardyń jeke basyn jasyrýǵa, aqsha aǵyndaryn baqylaýdy qıyndatýǵa jáne zańsyz qyzmetti júrgizý úshin shetel azamattarynyń atyna rásimdelgen bank shottary men baılanys quraldaryn paıdalanýǵa múmkindik bergen. Zańsyz oıyn platformasy táýlik boıy jumys istep, qatysýshylarǵa onlaın-poker formatynda aqsha tigip, utysty qolma-qol aqshaǵa aınaldyrý múmkindigin usynǵan, — delingen habarlamada.
Uıymdastyrýshylar áleýmettik jelilerdi, messendjerlerdi jáne jarnama quraldaryn paıdalanylyp, onlaın-kazıno qyzmetine 20 myńnan astam paıdalanýshy tartylǵan. Sonymen qatar uıymdastyrýshylar úshinshi tulǵalardyń bank shottaryn, ıaǵnı «dropperlerdiń» shottaryn paıdalanýdyń tarmaqtalǵan júıesin qurǵan.
Osy maqsatta kúdiktiler Qazaqstanǵa shetel azamattarynyń uıymdasqan túrde kelýin qamtamasyz etip, olardyń atyna 400 AQSh dollaryna deıingi syıaqy úshin bank kartalary men mobıldi bankıng rásimdegen.
Tergeý barysynda onlaın-kazıno qyzmetin qamtamasyz etý úshin 60-tan astam drop-shot paıdalanylǵany anyqtaldy. Oıynshylardan túsken qarajat kólemi 7,5 mlrd teńgeden asty.
— Sot sanktsııasymen Almaty qalasyndaǵy páterge, úsh avtokólikke, sondaı-aq dropperlerdiń bank shottaryndaǵy 158 mln teńge kólemindegi aqsha qarajatyna tyıym salyndy. Tergeý jalǵasyp jatyr, — dep habarlady Qarjylyq monıtorıng agenttigi.
Eske salaıyq, buǵan deıin Qazaqstanǵa World Business Consulting qarjy pıramıdasy isi boıynsha kúdikti ekstradıtsııalanǵanyn habarlaǵanbyz.
