Qazaqstanda sheteldik dıplomdy taný onlaın qoljetimdi

ASTANA. KAZINFORM – Elimizde sheteldik dıplomdardy taný eGov Mobile qosymshasynda qoljetimdi. Tolyǵyraq Ulttyq aqparattyq tehnologııalar AQ aqparatynda aıtylǵan.

- eGov Mobile qosymshasynda shetelde alynǵan joǵary jáne joǵary oqý ornynan keıingi bilim týraly dıplomdardy taný qyzmeti qoljetimdi. Qyzmet sheteldik joǵary oqý oryndarynyń túlekterine Qazaqstanda jumysqa ornalasý nemese oqýyn jalǵastyrý úshin dıplomyn resmı túrde rastaýǵa múmkindik beredi. Buryn dıplomdy taný rásimi jeke ótinish berýdi jáne qaǵaz qujattardy jınaýdy talap etse, endi búkil protsess onlaın formatta qoljetimdi. Bul ótinishti qaraý merzimin edáýir qysqartyp, qyzmetti paıdalanýshylar úshin yńǵaıly, - delingen habarlamada.

Onlaın qyzmetti paıdalaný úshin:

- eGov Mobile qosymshasynda avtorızatsııadan ótý qajet;

- «Qyzmetter» – «Bilim» bóliminde «Joǵary jáne joǵary oqý ornynan keıingi bilim týraly qujattardy taný» qyzmetin tańdaý;

- ótinishti toltyryp, qajetti qujattardy tirkep jáne tólem jasaý qajet;

- ótinishti qol qoıýdyń qoljetimdi ádisteriniń birimen rastaý.

Ótinish zańnamada belgilengen merzimde qaralady. Nátıjesinde, paıdalanýshy dıplomdy taný týraly elektrondyq qujatty alady nemese zańda kózdelgen negizder boıynsha dáleldi jaýap beriledi.

Jańartylǵan qyzmetti Tsıfrlyq damý, ınnovatsııalar jáne aeroǵarysh ónerkásibi mınıstrliginiń Memlekettik kórsetiletin qyzmetter komıteti, «Ulttyq aqparattyq tehnologııalar» AQ jáne Ǵylym jáne joǵary bilim mınıstrligimen birlesip iske asyrdy.

Aıta ketsek, qazaqstandyqtar dıplomdaryn eGov.kz portalynda tsıfrlandyra alady.