Qazaqstanda sheteldik ártisterdiń kontsertine jańa talaptar engizilmek
ASTANA. KAZINFORM — Mádenıet jáne aqparat vıtse-mınıstri Evgenıı Kochetov Qazaqstanda óner kórsetetin sheteldik ártisterge qoıylyp jatqan shekteýler týraly aıtty.
Onyń aıtýynsha, mınıstrlik jergilikti atqarýshy organdarǵa kontsertterdi uıymdastyrýǵa kómektesýdi kózdep otyr. Ártistermen jasalǵan kelisimsharttarda olardyń mindetteri anyq kórsetilgen.
— Eń aldymen, bul mindettemeler olar oryndaıtyn kompozıtsııaǵa qatysty. Osy kompozıtsııalar elimizdiń tártibin buzbaýy tıis, pornografııa men esirtkini nasıhattamaýy kerek, ıaǵnı zańsyz kontenttiń tolyq tizimi eskerilgen. Eger bári durys bolsa, ártister belgili bir qalada óner kórsetýge ruqsat alady. Bizdiń oıymyzsha, bul tolyǵymen durys qadam, — dedi Evgenıı Kochetov Senatta tilshiler suraǵyna jaýap bere otyryp.
Eger ártistiń repertýarynda tyıym salynǵan shyǵarmalar bolsa, vedomstvo olardy oryndamaýǵa keńes beredi.
Budan buryn habarlanǵandaı, búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine kreatıvti ındýstrııalardy qoldaý jáne damytý máseleleri boıynsha ózgerister men tolyqtyrýlar engizý týraly» zań maquldandy.