Qazaqstanda sheteldik JOO-lardyń taǵy 5 fılıaly ashylmaq

NUR-SULTAN. QazAqparat – 2025 jylǵa deıin Qazaqstan Respýblıkasynyń aýmaǵynda sheteldik joǵary oqý oryndarynyń keminde 5 fılıaly men ókildigi ashylady. Bul jaıynda Májilis depýtattarynyń saýalyna QR Ǵylym jáne joǵary bilim mınıstri Saıasat Nurbektiń jaýabynda aıtylǵan, dep habarlaıdy QazAqparat tilshisi.

«M.Qozybaev atyndaǵy Soltústik Qazaqstan memlekettik ýnıversıtetin Arızona ýnıversıtetine senimgerlik basqarýǵa berý týraly másele pysyqtaldy. Oqytý qazaq, orys jáne aǵylshyn tilderinde: bilim berý, IT, ınjenerııa, agro-tehnıkalyq jáne taǵy basqa baǵyttar boıynsha júrgiziletin bolady. Oqý jáne ǵylymı zerthanalardy qurý jáne jaraqtandyrý arqyly joǵary oqý oryndarynyń zertteý ekojúıesin qalyptastyrýdy kózdeıtin «Akademııalyq artyqshylyq ortalyqtary» jobasy iske asyrylýda. Budan basqa, 2025 jylǵa deıin Qazaqstan Respýblıkasynyń aýmaǵynda sheteldik joǵary oqý oryndarynyń keminde 5 fılıaly men ókildigin ashý josparlanýda», - dedi mınıstr jaýabynda.

Onyń atap ótýinshe, bul joǵary oqý oryndarynyń ǵylymı jáne akademııalyq damýyn kúsheıtýge, ozyq ǵylymı tájirıbeni engizýge, basqarý júıesin transformatsııalaýǵa jáne bilim berý mazmuny men oqý protsesine álemdik bilim berý standarttaryn engizýge múmkindik beredi.

«Jyldan jylǵa qazaqstandyq joǵary oqý oryndarynyń halyqaralyq bilim berý keńistigindegi pozıtsııalary nyǵaıyp keledi. QS-2022 reıtınginde 14 qazaqstandyq JOO, Times Higher Education reıtınginde 3 JOO oryn aldy. Ál-Farabı atyndaǵy QazUÝ-dyń qazaqstandyq joǵary oqý orny kezekti ret álemniń top-200 úzdik ýnıversıtetteriniń qataryna endi (175-oryn). L.N. Gýmılev atyndaǵy EUÝ (328 oryn) jáne M.Áýezov atyndaǵy Ońtústik Qazaqstan ýnıversıteti (482 oryn) sııaqty taǵy 2 ýnıversıtet QS reıtınginiń top-500 qataryna endi», - dedi Saıasat Nurbek.