Qazaqstanda sheteldik valıýtada ıpoteka berýge tyıym salynady - N. Sabılıanov
ASTANA. QazAqparat - Qazaqstanda sheteldik valıýtada ıpoteka berýge tyıym salynady. Bul týraly búgin Májilistiń jalpy otyrysynda depýtat Nurtaı Sabılıanov málim etti.
Eske sala keteıik, Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine ekinshi deńgeıdegi bankterdiń jumys istemeıtin kredıtteri men aktıvteri, qarjylyq qyzmetter kórsetý jáne qarjy uıymdary men Qazaqstan Respýblıkasy Ulttyq bankiniń qyzmeti máselesi boıynsha ózgerister men tolyqtyrýlar engizý týraly» QR Zańynyń jobasy ekinshi oqylymda maquldanǵan bolatyn.
«Zań jobasy sheńberinde Qazaqstannyń Dúnıejúzilik saýda uıymyna kirýine baılanysty sheteldik bankter fılıaldarynyń jaýaptylyǵy da bekitilip otyr. Sonymen qatar, sheteldik bankterdiń fılıalyna Ulttyq bank tarapynan baqylaý jasaý quqyǵy usynylady. Ekinshi, qarjylyq qyzmetterdi tutynýshylardyń quqyǵyn qorǵaý maqsatynda sheteldik valıýtada tabysy joq jeke tulǵalarǵa sheteldik valıýtada ıpotekalyq qaryz berýge tyıym salý kózdeledi. Budan bólek, qaryz tóleýge qabiletsiz alýshynyń mindettemelerine qatysty erekshe tártip qarastyrylyp otyr. Aıta keteıik, buryn qaryz tóleýge qabiletsiz tulǵa eń birinshi kezekte bankterdiń shyǵyndaryn ótep, sosyn ǵana negizgi qaryzyn tóleýi tıis edi. Bul tutynýshylarǵa qıyndyq týdyrǵan bolatyn», - dedi N. Sabılıanov.
Sonymen qatar, depýtattyń aıtýynsha, zań jobasyna sáıkes, ıpotekalyq nesıe sharty boıynsha mindetteme merzimi ótkennen soń 180 kúnnen keıin syıyaqy men turaqsyzdyq aıybyn esepten shyǵarý normasy da qamtylyp otyr. Nesıeniń de turaqsyzdyq aıybynyń da mólsheri qaıta qaraldy. Endi 90 kúnnen keıin nesıe aıyby tómen stavkamen esepteledi, sosyn bul berilgen nesıeniń 10 paıyzynan aspaýy kerek.
«Budan basqa, qarjylyq turaqtylyqty qoldaý maqsatynda ulttyq valıýtanyń erkin ózgermeli baǵamyna kóshýine baılanysty jeke tulǵalardyń ótemaqy tóleýge qatysty operatsııalar júrgizý jónindegi ókilettilikteri qaralyp otyr. Osy rette tulǵalardyń valıýta aıyrbastaýdyń naryqtyq baǵamynan aıla-sharǵy jasaý maqsatynda mámileler jasaǵany úshin jaýaptylyǵy qarastyryldy», - dedi depýtat.
