Qazaqstanda sheteldik uıymdar teńgemen esep aıyrysady
«Qazaqstan 2015 jyly Dúnıejúzilik saýda uıymyna kirdi. Sondyqtan Qazaqstanda sheteldik qarjylyq emes uıymdardyń qyzmeti keńeıtildi. 2020 jylǵy jeltoqsannan bastap sheteldik bankter jáne saqtandyrý uıymdary fılıaldary arqyly Qazaqstanda jumys isteýge múmkindik alady. 2015 jáne 2017 jyldary Qazaqstanda «Astana» halyqaralyq qarjy ortalyǵy jáne «Qorǵas» shekara mańy yntymaqtastyǵy halyqaralyq ortalyǵy» arnaıy ekonomıkalyq aımaqtary quryldy. Olardyń aýmaǵynda valıýtalyq retteýdiń erekshe rejımi kózdeledi. AHQO týraly konstıtýtsııalyq zańǵa sáıkes onyń aýmaǵynda valıýtalyq operatsııalardy júrgizý tártibi Ulttyq Bankpen kelise otyryp belgilenedi. Osy oraıda, zań jobasyn ázirleý qajet boldy», - dedi Aqyshev «Valıýtalyq retteý jáne valıýtalyq baqylaý týraly» zań jobasy boıynsha baıandamasynda.
Atap aıtqanda, zań jobasynyń negizgi mindeti - valıýtalyq operatsııalardyń monıtorıngin keńeıtý jáne Qazaqstan aýmaǵyndaǵy shetel valıýtasymen esep aıyrysýdy qysqartý. Atalǵan normalardy iske asyrý valıýtalyq baqylaý tıimdiligin, onyń ishinde elden aqshany áketýge qarsy is-qımyldy arttyrýǵa múmkindik beredi.
Zań jobasynda lıberaldy valıýtalyq retteý qaǵıdattaryn saqtaý kózdelgen. Bul azamattarǵa jáne bıznes sýbektilerine qosymsha júktemesiz Qazaqstan Respýblıkasy ıntegratsııalyq birlestikter jáne halyqaralyq uıymdardaǵy músheligi aıasynda qabyldaǵan halyqaralyq mindettemelerdiń oryndalýyn qamtamasyz etedi.
«Qoldanystaǵy zańnama boıynsha sheteldik uıymdardyń fılıaldary beırezıdentter bolyp tabylady. Bul olarǵa Qazaqstannyń ishinde rezıdenttermen valıýtalyq operatsııalardy júzege asyrýǵa múmkindik beredi. Qazaqstandyq kompanııalar úshin buǵan tyıym salynǵan. Máselen, 2017 jyly sheteldik kompanııa fılıaldarynyń rezıdenttermen valıýtalyq operatsııalar kólemi 2,7 mlrd AQSh dollar qurady. Qazirgi ýaqytta elimizde sheteldik uıymdardyń 4,5 myń fılıaly tirkelgen. Dúnıejúzilik saýda uıymyna tolyq kirgennen keıin, onyń sanynyń ulǵaıýy kútiledi. Sáıkesinshe, el ishinde shetel valıýtasyndaǵy tólemder kóbeıedi, bul ulttyq múddelerge sáıkes kelmeıdi. Osyǵan baılanysty sheteldik uıymdar fılıaldarynyń qazaqstandyq kompanııalarmen esep aıyrysýlaryn teńgege aýystyrý usynylady. Qyzmeti memlekettiń atynan jasalǵan kelisimder arqyly retteletin kompanııalarǵa ózgerister qoldanbaıdy. Olar beırezıdent mártebesinde qala beredi», - dep naqtylady UB basshysy.
Danııar Aqyshevtiń atap ótýinshe, osy zań qoldanysqa engizilgenge deıin jasalǵan sharttarǵa qatysty talaptardyń nasharlaýy kózdelmeıdi.
Bul túzetýler jergilikti kompanııalar men sheteldik uıymdardyń fılıaldary úshin bıznesti júrgizýge teń jaǵdaılar jasaıdy.