Qazaqstanda sheteldik qandaı JOO-lardyń fılıaldary ashylady
2023 jyldyń qyrkúıegine qaraı elimizdiń birqatar bilim berý mekemeleri bazasynda aldyńǵy qatarly 7 joǵary oqý ornynyń fılıaldaryn ashý josparlanýda.
Máselen, Q. Jubanov atyndaǵy Aqtóbe óńirlik ýnıversıtetiniń bazasynda shotlandııalyq Herrıot-Ýott ýnıversıtetiniń fılıaly ashylmaq. Bilim berý qyzmeti «Kompıýterlik ınjenerııa», «Elektr energetıkasy», «Munaı ınjenerııasy jáne energııa menedjmenti» baǵyttarynda bakalavrıat baǵdarlamasy boıynsha júrgiziledi. Bul fılıalǵa 300 adamdy qabyldaý josparlanǵan.
Semeıdegi Shákárim ýnıversıteti bazasynda Polshanyń Bydgoş qalasyndaǵy Ekonomıka ýnıversıtetiniń fılıalyn ashý kózdelgen. Onda «qos dıplom» baǵdarlamasy sheńberinde bıyl «Mehatronıka» (aǵylshyn tilinde) jáne «Sport menedjmenti» mamandyqtary ashylady. Al kelesi oqý jyly «Ekonomıka» mamandyǵynda 1, 3, 4-kýrstar - Shákárim ýnıversıtetinde, 2-kýrs – Polsha ýnıversıtetinde júzege asyrylady.
2024 jyldan bastap Qorqyt ata atyndaǵy Qyzylorda ýnıversıtetinde Seýl Ulttyq ǵylym jáne tehnologııa ýnıversıteti (Ońtústik Koreıa) fılıaly óz jumysyn bastaıdy. Onda «Injenerlik beıin» boıynsha («Kıberqaýipsizdik», «Informatıka», «Jasandy ıntellekt») bakalavrlardy daıarlaıdy.
Budan basqa, bıylǵy qyrkúıek mynadaı JOO fılıaldaryn qurý jáne qos dıplom baǵdarlamasymen oqytý kózdelýde:
- M. Dýlatı atyndaǵy Taraz ýnıversıteti bazasynda reseılik D. Mendeleev atyndaǵy Reseı hımııa-tehnologııalyq ýnıversıtetiniń fılıaly;
- І. Jansúgirov atyndaǵy Jetisý ýnıversıtetinde túrkııalyq Hadjettepe ýnıversıtetiniń fılıaly. Stýdentter 1-2 kýrsty Jetisý ýnıversıtetinde, al 3-4 kýrsty Hadjettepe ýnıversıtetinde oqıdy. Onda qazaq tili men Qazaqstan tarıhy mindetti komponent bolady.
- Ońtústik Qazaqstan pedagogıkalyq ýnıversıtetinde túrkııalyq Gazı ýnıversıtetiniń fılıaly. Onda «Fızıka muǵalimderin daıarlaý» baǵytynda, sondaı-aq «Shet tili: eki shet tili» baǵyty boıynsha qos dıplom baǵdarlamasyn iske asyrý josparlanýda. Oqý túrik jáne aǵylshyn tilderinde ótedi.
- Esenov atyndaǵy Kaspıı tehnologııalar jáne ınjınırıng ýnıversıteti janynan nemis joǵary oqý oryndarynyń konsortsıýmdaryn (Berlın tehnıkalyq ýnıversıteti, Darmshtat tehnıkalyq ýnıversıteti, Berlınniń Erkin Ýnıversıteti, Gambýr qoldanbaly ǵylymdar ýnıversıteti) ashý josparlanǵan. Qazirgi tańda konsortsıýmdar jumysyn iske asyrý tetikteri qarastyrylýda.
