Qazaqstanda shetelden bilikti jumys kúshin tartý tártibi jeńildetiledi
Óz sózinde ol QR kóshi-qon saıasaty ishki eńbek naryǵyn qorǵaý men ony otandyq mamandar úshin saqtaýǵa, sonymen qatar, joǵary bilikti sheteldik jumys kúshin tartýǵa negizdelgenin atap ótti.
«2015 jylǵy 24 qarashada Memleket basshysy qol qoıǵan «Qazaqstan Respýblıkasynyń keıbir zańnamalyq aktilerine halyqtyń kóshi-qony jáne jumyspen qamtylýy máseleleri boıynsha ózgerister men tolyqtyrýlar engizý týraly» QR Zańyna saı, 2017 jyldyń 1 qańtarynan bastap ShJK tartýdyń jeńildetilgen tártibi engizilmek. Onyń ishinde Qazaqstanǵa kelgen shetel mamandary ekonomıkanyń basyńqy salalaryndaǵy suranysqa ıe mamandyqtar tizimindegi kez kelgen jumys ornyna mamandyǵy boıynsha biliktilik anyqtamasynyń negizinde úsh aıdyń ishinde ózdiginen jumysqa ornalasa alady. Shetel mamany onyń biliktilik deńgeıin rastaıtyn bilimi, jumys ótili, tájirıbesi jáne t.b. kórsetiletin baldyq júıe boıynsha belgili bir baǵaǵa ıe bolady. Ol eńbek kelisimshartynda kórsetilgen merzimge jumysqa tura alady, biraq bul merzim úsh jyldan aspaýy tıis», - dep atap aıtty Aqmadı Sarbasov. Onyń aıtýynsha, elge kirýdiń basty sharty - shetel mamanynyń bilim men biliktilik deńgeıiniń joǵarylyǵy bolyp tabylady.
Sonymen qatar ol 2017 jylǵy qańtardan bastap ShJK tartý úshin jumys berýshilerge ruqsat berý sharalary qaıta qarastyrylatynyn málimdedi.
«Endi kvota jumys berýshilerdiń suranysyn, aımaqtardaǵy jumys kúshine degen suranysty, jumyssyz azamattar sanyn, ótken jylǵy ShJK paıdalaný tıimdiligin baǵalaý men eńbek resýrstary esebinen jumys kúshi suranysyn qanaǵattandyrýdy eskere otyryp, ekonomıkalyq qyzmet túrlerine qaraı beriletin bolady. ShJK tartý kvotasy eńbek mıgratsııasy men eńbek etetin mıgranttardy áleýmettik qorǵaý jónindegi yntymaqtastyq týraly QR ratıfıkatsııalaǵan halyqaralyq kelisim sharttar bolǵan jaǵdaıda beriledi. Jeke tulǵalarǵa qyzmet etý maqsatynda eńbek mıgranttaryn tartý kvotasyn (úı sharýashylyǵynda qyzmet kórsetý/eńbek etý) QR ІІM keler jylǵy suranys boljamyna saı jasaıtyn bolady», - dep túsindirdi Aqmadı Sarbasov.
Sonymen birge, kelesi jyldan bastap ShJK tartýǵa kelisim alý úshin jumys berýshiler salyq tóleıtin bolady. Onyń kólemi shaqyrylatyn jumyskerlerdiń sanaty men jumys isteıtin salasyna qaraı saralanbaq.
Іshki korporatıvtik aýysýlar rásimderin jeńildetý isi Dúnıejúzilik saýda uıymynyń sharttaryna sáıkes júzege asyrylady.
Jalpy alǵanda, kóshi-qon saıasatyn jetildirýdiń joǵaryda usynylǵan sharalary elimizdiń turaqty áleýmettik-ekonomıkalyq ósimine yqpal etedi.