Qazaqstanda shetel valıýtasymen aıyrbastaý operatsııalaryn júrgizýden negizsiz bas tartýǵa tyıym salyndy
ASTANA. QazAqparat - Qazaqstanda qolma-qol shetel valıýtasymen aıyrbastaý operatsııalaryn uıymdastyrý qaǵıdalarynda aıyrbastaý operatsııalaryn júrgizýden negizsiz bas tartýǵa tyıym salynǵan.
Eger aıyrbastaý pýnkti operatsııany kassada qajetti qolma-qol aqshanyń bolmaýy sebepti júrgizbese, kassır operatsııany júrgizýden bas tartylǵan adamǵa somany jáne operatsııany júrgizýden bas tartý ýaqytyn kórsete otyryp, anyqtama berýi qajet, dep habarlaıdy QR Ulttyq bankiniń baspasóz qyzmeti.
Erkin baǵam belgileý jaǵdaıynda bir kún ishinde baǵam kúrt ózgergen kezde keıbir aıyrbastaý pýnktteri belgili bir valıýtalar boıynsha operatsııalardy toqtatyp jatady. Mundaı jaǵdaı 2016 jylǵy 23 jáne 24 qańtarda Almaty jáne Astana qalalaryndaǵy aıyrbastaý pýnktterinde baıqaldy. Shekti marjany keńeıtý aıyrbastaý pýnktteriniń valıýtany satyp alý baǵamyn jáne satý baǵamyn belgileýdiń ıkemdirek tásilin qamtamasyz etip, aıyrbastaý pýnktteriniń jumysyndaǵy irkilispen baılanysty týyndaıtyn máselelerdi joıady»,- delingen habarlamada.
Aıyrbastaý pýnktteriniń jumysyna shaǵymdy aıyrbastaý pýnktiniń ornalasqan jeri boıynsha Ulttyq Banktiń aýmaqtyq fılıaldaryna berý kerek. Aıyrbastaý pýnktteri klıentteriniń aýmaqtyq fılıalǵa berilgen jazbasha ótinishi negizinde ǵana aıyrbastaý pýnktiniń qyzmetine tekserý júrgiziletin bolady. Ótinish berý nysany mindetti túrde árbir aıyrbastaý pýnktiniń aqparattyq stendinde ornalastyrylady. Tómende Ulttyq bank aýmaqtyq fılıaldarynyń «jedel jelileriniń» telefondary berilgen, ol telefondar boıynsha aıyrbastaý pýnktteriniń qyzmetindegi buzýshylyqtar týraly habarlar qaldyrýǵa jáne oryn alyp otyrǵan shaǵymdar boıynsha jazbasha ótinishter berý máseleleri boıynsha konsýltatsııalar alýǵa bolady.
Eske sala ketsek, erkin ózgermeli aıyrbastaý baǵamynyń rejimine ótkennen soń jáne sonyń saldarynan bolǵan baǵam devalvatsııasynan keıin buryn qoldanysta bolǵan qolma-qol shetel valıýtasynyń satyp alý baǵamynyń satý baǵamynan aýytqý shekteri (AQSh dollary úshin 2 teńge, eýro úshin 3 teńge) teńgeniń aıyrbastaý baǵamynyń jańa mánderine sáıkes kelmeıtin boldy.
Osyǵan oraı, 2016 jylǵy 1 aqpannan bastap baǵamnyń jańa mánderine tepe-teń túrde AQSh dollaryn satyp alý baǵamy men satý baǵamy arasyndaǵy ruqsat etilgen marja 6 teńgege deıin, al eýro boıynsha 7 teńgege deıin ulǵaıtyldy (Qazaqstan Respýblıkasy Ulttyq Banki Basqarmasynyń 2015 jylǵy 19 jeltoqsandaǵy № 257 qaýlysy).
