Qazaqstanda shetel ınvestorlarymen jumys isteýge daıar kásipkerlerdiń tizimi jasalady
ASTANA. QazAqparat - Qazaqstanda aldaǵy aılarda sheteldik ınvestorlarmen jumys isteýge daıar jergilikti kásipkerlerdiń tizimi jasalmaq. Bul týraly Úkimet otyrysynan keıin baspasóz ortalyǵynda ótken jıynda «Kazakh Invest» UK» AQ basqarma tóraǵasy Saparbek Tuıaqbaev málim etti, dep habarlaıdy «QazAqparat» HAA tilshisi.
«Bizde sheteldik ınvestorlarǵa kóptep kóńil bólinedi, jergilikti kásipkerlerge kóńil jetkilikti dárejede bólinbeıdi» degen sekildi keıbir jergilikti kásipkerlerde durys emes pikir qalyptasyp qalǵan. Birinshiden, biz kásipkerlerge qoldaý kerek kezde sheteldik nemese jergilikti dep bólip jatpaımyz. Kim de kim ınvestıtsııa salyp, jobasy bolsa, tolyqqandy qoldaý alady», - deıdi Saparbek Tuıaqbaev.
«Kazakh Invest» basshysynyń aıtýynsha, shetelden keletin ınvestorlar Qazaqstanǵa joly túsken kezde «jergilikti seriktester bar ma?» degen suraqty mindetti túrde qoıady eken.
«Osy sebepti, jergilikti kásipkerlermen tyǵyz jumysty bastadyq. Jergilikti kásipkerlerdiń qandaı da bir jobasy bar ma, qosymsha ınvestorǵa zárý me degen sekildi suraqqa jaýap izdep, qajet bolǵan jaǵdaıda joba ázirleýge kómektesemiz. Jaqyn aılardyń ishinde sheteldik seriktesterdi izdep júrgen jergilikti kásipkerlerdiń tizimi shyǵady. Ol da sheteldik ınvestorlarǵa óte qajet», - deıdi Tuıaqbaev.
Ol sondaı-aq, Qazaqstanda qazirgi tańda jergilikti kásipkerlerdiń ónimderiniń eksportqa shyǵyp jatqandary shamaly ekenin eske saldy.
«Olar ónimderin eksportqa syrtqa shyǵarý úshin eń birinshi ne kerek? Dúnıejúzilik ekonomıkany biletin, naryqty túısinetin, joǵary tehnologııasy bar seriktes kerek. Sondyqtan, sheteldik ınvestorlardy tartý bizdiń kásipkerlerdi tek qana kúsheıtedi», - dep túıdi «Kazakh Invest» basshysy.
Foto: static.tildacdn.com
