Qazaqstanda shetel azamattaryna turýǵa ruqsat berý qaǵıdalary ózgeredi
ASTANA. KAZINFORM – Іshki ister mınıstrligi shetel azamattary men azamattyǵy joq adamdarǵa Qazaqstan Respýblıkasynda ýaqytsha jáne turaqty turýǵa ruqsat berý qaǵıdalaryna ózgerister engizdi. Qujat jobasy «Ashyq NQA» portalynda jarııalandy.
Ýaqytsha turýǵa ruqsat alý úshin qyzmet alýshylar tirkelgen jeri boıynsha aýmaqtyq polıtsııa organdaryna nemese «Azamattarǵa arnalǵan úkimet» memlekettik korporatsııasy arqyly ne bolmasa elektrondyq úkimet portaly arqyly sheteldikke nemese azamattyǵy joq tulǵaǵa ýaqytsha turýǵa ruqsat berý týraly ótinish-saýalnamamen jáne bolý maqsatyna qaraı qajetti qujattarmen júginedi.
Memlekettik qyzmet kórsetý kezinde qyzmet alýshynyń ózi nemese zańdy tulǵanyń ókiletti ókili (buıryq nemese senimhat negizinde) jeke qatysýy mindetti.
Qyzmet kórsetýshiniń ýákiletti qyzmetkeri qujatty túsken kúni qabyldap, tekseredi. Eger qujattar tolyq bolmasa, qyzmetker ótinishti qabyldaýdan bas tartyp, tıisti qolhat beredi.
Sondaı-aq qujattardy qabyldaǵannan keıin (onyń ishinde memlekettik korporatsııa nemese portal arqyly kelip túsken ótinishter boıynsha) qyzmet kórsetýshiniń ýákiletti qyzmetkeri mynadaı tekserýler júrgizedi:
Biryńǵaı eńbek sharttaryn esepke alý júıesindegi málimetterdiń jumys berýshi derekterimen sáıkestigin, onyń ishinde jumys berýshi men qyzmetker arasynda eńbek shartynyń jasalǵanyn;
Biryńǵaı eńbek sharttaryn esepke alý júıesinde kórsetilgen sheteldik qyzmetkerdiń eńbek qyzmetin júzege asyrý negiziniń jumys berýshi usynǵan málimettermen sáıkestigin.
Qujattar qyzmet kórsetýshi nemese «Azamattarǵa arnalǵan úkimet» korporatsııasy portaly arqyly qabyldanady:
memlekettik qyzmetti ýaqytyly alý úshin júgingenimen, aqparattyq júıelerdegi aqaýlar nemese qyzmet kórsetýshi tarapynan qate bas tartý saldarynan bolý merzimi ótip ketken adamdardan;
Qazaqstan Respýblıkasynyń zańnamasynda belgilengen merzim ótken soń 30 táýlikten aspaıtyn merzimde elden shyqpaýy sebebinen halyq kóshi-qony salasynda ákimshilik jaýapkershilikke tartylǵan tulǵalardan;
16 jastaǵy, biraq kámelet jasyna tolmaǵan tulǵalardan, eleýsiz quqyq buzýshylyqqa baılanysty sot isin júrgizýdi toqtatý týraly sot sheshimi shyqqannan keıin jáne QR Ákimshilik quqyq buzýshylyqtar kodeksiniń 517-baby boıynsha 30 kún ishinde elden shyqpaǵany úshin ákimshilik jaýapkershilikke tartylǵandardan.
Qujat jobasy bıyl 14 maýsymǵa deıin qoǵamdyq talqylaýǵa usynylyp otyr.
Jyl basynda habarlaǵanymyzdaı, endi elimizge keletin shetel azamattaryna QR kod beriledi.
Sondaı-aq bıyl sáýirde Qazaqstan shetel azamattaryna JSN (jeke sáıkestendirý nómiri) berýdi qaıta bastaıtyny belgili boldy.