Qazaqstanda sheneýnikterge qarjylyq sanktsııa qoldanylýy múmkin

NUR-SULTAN. QazAqparat - Qazaqstanda sheneýniktiń kirisi-shyǵysy sáıkes kelmese qarjylyq sanktsııa qoldanylýy múmkin. Bul týraly búgin QR Sybaılas jemqorlyqqa qarsy is-qımyl agenttiginiń alqa májilisinde vedomstvo basshysy Alık Shpekbaev aıtty, dep habarlaıdy QazAqparat tilshisi.

«Agenttik sheneýnikterdiń kiristeri men shyǵystary birshama sáıkes kelmegen jaǵdaıda mansaptyq jáne qarjylyq sanktsııa qoldanýdy usynady.

Munymen qosa, agenttik barlyq memlekettik qyzmetshilerdiń, quqyq qorǵaý organdary qyzmetkerleri men áskerı qyzmetshilerdiń deklaratsııalaryn jarııalaýdy mindetteýdi jón sanaıdy», - dedi Alık Shpekbaev.

Onyń aıtýynsha, bul bastamany barlyq memlekettik organdar qoldaǵan jáne taıaý arada Úkimettiń tıisti qaýlysyna ózgertýler engiziletin bolady.