Qazaqstanda ishektiń qabyný aýrýyna shaldyqqandar kóbeıip barady
ALMATY. KAZINFORM – Qazaqstanda kron men oıyq jaraly kolıt aýrýlary jasaryp keledi. Bul týraly Almatyda ótken dúnıejúzilik ishektiń qabyný aýrýlary IX ulttyq forýmda aıtyldy.
Forýmǵa otandyq jáne Reseı, Belgııa, Izraılden 300-den astam dáriger qatysty. Atap aıtar bolsaq, gastroenterolog, koloproktolog, terapevt, morfolog, ınfektsıonıst, endoskopıst mamandary men fýnktsıonaldyq dıagnostıka dárigerleri bas qosty.
Dárigerler usynǵan resmı derekke súıener bolsaq, Qazaqstanda jyl saıyn ishektiń qabyný aýrýlaryna ( ІQA) shaldyqqandar kóbeıip keledi. Eger 2018 jyly elde kron aýrýy bar 555 adam jáne oıyq jaraly kolıtpen 2218 adam tirkelgen bolsa, qazir kron aýrýy bar 1631 jáne oıyq jaraly kolıtpen 7305 naýqas tirkelgen. Onyń ishinde balalar men jasóspirimder de bar.
– 2024 jyldyń statıstıkasy boıynsha, ár 100 myń adamǵa shaqqanda 5-10-ǵa jýyq ІQA jaǵdaıy tirkelgen, bul san artýy múmkin. Bul dıagnostıkanyń jaqsarýyna jáne naqty aýrýdyń ósýine baılanysty. ІQA jasóspirimder men orta jastaǵylarda jıi dıagnostıkalanýy erekshe alańdaýshylyq týǵyzady. Dıagnozdy qoıýdyń ortasha jasy - 35-40 jas. Táýekel faktorlarynyń arasynda ýrbanızatsııa, stress, ınfektsııalar jáne antıbıotıkterdi baqylaýsyz qabyldaý bar,– delingen Kardıologııa jáne ishki aýrýlar ǵylymı-zertteý ınstıtýty taratqan habarlamada.
Sarapshylar atap ótkendeı, birqatar óńirde endoskopııalyq dıagnostıka men patsıentterge psıhologııalyq qoldaý jetpeıdi.
Kardıologııa jáne ishki aýrýlar ǵylymı-zertteý ınstıtýtynda Kron aýrýy men oıyq jaraly kolıtpen kúrestiń jańa tehnologııasy engizilgen. Sonyń arqasynda almatylyq dárigerler jazylmaıtyn dertti asqyndyrmaı, adamdardyń qalypty ómir súrýine jol ashty.
– Bizdiń Kardıologııa jáne ishki aýrýlar ǵylymı-zertteý ınstıtýtynda zamanaýı dıagnostıkalyq bazamen jabdyqtalǵan jáne bilikti mamandardyń mýltıdıstsıplınarlyq toby jumys isteıtin elimizdegi alǵashqy IQA, qysqa ishek sındromyn emdeý jáne nýtrıtıvtik túzetý boıynsha mamandandyrylǵan ortalyq ashyldy. Onyń negizgi mindetteri: IQA jáne QІS bar naýqastardyń ómir súrý sapasyn jaqsartý jáne yqtımal asqynýlardyń aldyn alý. Ortalyq bilikti kómekke muqtaj jandarǵa árdaıym ashyq, – deıdi emdeý mekemesiniń basshysy Marat Pashımov.
Osyǵan deıin almatylyq kardıologtar sırek kezdesetin júrek aýrýyna operatsııa jasaǵan bolatyn.