Qazaqstanda shekara arqyly ótý tártibi qataıtyldy

QOSTANAI. KAZINFORM – Qazaqstanda kelmeı qalǵan jaǵdaıda aqy tóleý talaby engizilip, brondy aýystyrýǵa shekteý qoıyldy. Sonymen qatar SMS jáne messendjer arqyly tirkeý sharalary iske qosyldy.

Bul týraly Qostanaı oblystyq memlekettik kirister departamentinen málim boldy.

QR Qarjy mınıstrligi ashyqtyq pen tıimdilikti qamtamasyz etý jáne jalǵan brondaý áreketterin qysqartý úshin №707 buıryqqa ózgeris engizdi.

Jańa talapqa sáıkes, júk kólikteri úshin bron túrlerin naqty ajyratý engizildi. Ádettegi jáne kezekten tys bron quny – 1 AEK, jedel jáne qaıtalama bron – 100 AEK bolyp belgilendi. Sondaı-aq 20 AEK kóleminde kepildik jarna qarastyrylǵan, ol rásimdeý kezinde buǵattalady jáne kelmeı qalǵan jaǵdaıda esepten shyǵarylady. Bul shara buǵan deıin barlyq ótinimderdiń 40%-yna deıin jetken jalǵan brondarmen kúresýge baǵyttalǵan.

Budan bólek, ákimdikterge ótkizý pýnktteriniń janynan kútý aımaqtaryn qamtamasyz etý mindetteldi. Kólik quraldarynyń VIN-kodtary boıynsha tirkeý jáne baqylaý erejeleri naqtylandy.

Shekaradan ótý faktisin avtomatty túrde rastaý úshin SEO «Búrkit» júıesimen ıntegratsııalanady. Sondaı-aq SMS jáne messendjerler arqyly tirkelýge ruqsat etilip, paıdalanýshylarǵa júıege qol jetkizýdi jeńildetý kózdelgen.

Brondy aýystyrý men joıýǵa lımıt qoıyldy. Endi tegin aýystyrýdy bir-aq ret júzege asyrýǵa bolady. Ár baǵyt boıynsha bir ǵana bron ustaýǵa ruqsat. Janýarlar, tez buzylatyn jáne qaýipti júkter sııaqty jekelegen sanattar úshin basymdyq beriletin slottar qarastyrylady.

Qostanaı oblysy boıynsha Memlekettik kirister departamentiniń málimetinshe, bul ózgerister ákimshilik júktemeni azaıtýǵa, alypsatarlyqty joıýǵa jáne shekaradaǵy elektrondy kezektiń jumysyn ashyq etýge baǵyttalǵan.

Osyǵan deıin Aqtóbede polıtsııa shekaradaǵy baqylaýdy kúsheıtkeni týraly jazdyq.