Qazaqstanda shegirtkeni joıýǵa arnalǵan dron satyp alynady

ASTANA. KAZINFORM – Qazaqstanda shegirtkeniń taralýyna tosqaýyl qoıý baǵytynda drondar paıdalanylady. Bul týraly vıtse-premer Serik Jumanǵarın aıtty.

«Kelesi jyly shegirtkeniń taralý aýmaǵy elimizde azaıady dep úmittenemin, ıaǵnı endi 2,5 mln gektar emes, odan da az bolady. Osyǵan kúsh salyp jatyrmyz», - dedi S. Jumanǵarın Senattyń jalpy otyrysynan keıin tilshiler suraǵyna jaýap bere otyryp.

Osy rette Premer-Mınıstrdiń orynbasary atalǵan zııankestermen tıimdi kúresý máselesine toqtaldy.

«Tıisti jabdyqtardy satyp alamyz, ıaǵnı kelesi jyldyń bıýdjetinde 100-ge jýyq dron eskeriledi. Osy tehnıkanyń jerdegi shegirtkeni anyqtaıtyn arnaıy baǵdarlamasy bolady. Osy arqyly zııankesterdi naqty anyqtap, olardy joıýǵa baǵyttalady. Bul dronnyń Aqtóbe oblysyndaǵy jumysy kórsetilgen edi. Sodan dronnyń tıimdi jumysyn baıqaýǵa bolady», - dedi Serik Jumanǵarın.

Buǵan deıin shegirtkege qarsy kúres sharalaryna 2,5 myńnan astam adam jumyldyrylǵany habarlandy.