Qazaqstanda shegirtkemen kúreske avıatsııa men drondar qoldanylyp jatyr
ASTANA. KAZINFORM - QR Aýyl sharýashylyǵy mınıstrligi aýyl sharýashylyǵy alqaptaryn shegirtke zııankesterinen qorǵaý baǵytyndaǵy josparly jumystardy jalǵastyryp jatyr. Búgingi tańda úıirli shegirtke túrlerine qarsy hımııalyq óńdeý 480 myń gektar aýmaqta júrgizildi.
QR aýyl sharýashylyǵy mınıstrliginiń baspasóz qyzmetiniń habarlaýynsha, Qorǵanys sharalary 12 óńirde arnaıy jerústi tehnıkasyn, ushqyshsyz ushý apparattaryn jáne avıatsııany paıdalaný arqyly júzege asyrylý ústinde.
Óńdeý jumystary kólemine qaraı Túrkistan oblysynda (291,2 myń ga), Jambyl oblysynda (116 myń ga), Aqtóbe oblysynda (35,6 myń ga) jáne Jetisý oblysynda (17,3 myń ga) oryndaldy.
Qalǵan óńirlerde agroónerkásiptik keshen salasyndaǵy aýmaqtyq ınspektsııa mamandary «Fıtosanıtarııalyq dıagnostıka jáne boljamdardyń respýblıkalyq ádistemelik ortalyǵy» mekesimen birlesip, zııankesterdiń taralý oshaqtaryn ýaqtyly anyqtaý maqsatynda aýyl sharýashylyǵy alqaptaryna monıtorıng pen tekserý jumystaryn júrgizip jatyr.
Barlyq óńirler qorǵanys sharalaryn tolyq kólemde júrgizý úshin qajetti pestıtsıdter qory men arnaıy tehnıkamen qamtamasyz etilgen.
-Shegirtkelerdiń shekaralas aýmaqtar arqyly kóshýine jol bermeý maqsatynda mınıstrlik kórshiles elderdiń salalyq vedomstvolarymen turaqty túrde jedel aqparat almasý jumystaryn qolǵa alyp keledi,-delingen habarlamada.
Shegirtke zııankesteriniń taralý jaǵdaıy men júrgizilip jatqan qorǵaý sharalary QR Aýyl sharýashylyǵy mınıstrliginiń aıryqsha baqylaýynda.
Osyǵan deıin shegirtkege qarsy kúres sharalary qaıtkende tıimdi bolatyny týraly jazdyq.
