Qazaqstanda shegirtkege qarsy óńdeý kólemi 900 myń gektarǵa azaıdy
ASTANA. KAZINFORM – Qazaqstanda shegirtkege qarsy hımııalyq óńdeý júrgiziletin aýmaq kólemi azaıyp keledi. Bıyl elimizde 2,2 mln gektar jerdi óńdeý josparlanǵan. Bul týraly Ortalyq kommýnıkatsııalar qyzmeti alańynda ótken brıfıngte QR Aýyl sharýashylyǵy vıtse-mınıstri Ermek Kenjehanuly málimdedi.
Vıtse-mınıstrdiń aıtýynsha, shegirtkeniń taralý aýmaǵy 2022 jyldan bastap ulǵaıyp, 2024 jyly eń joǵary deńgeıge jetken. Sol jyly shamamen 3,1 mln gektar jerge hımııalyq óńdeý júrgizilgen.
Alaıda ótken jyldan bastap zııankesterdiń taralý qarqyny báseńdeı bastaǵan. Máselen, 2025 jyly 2,7 mln gektar jer óńdeldi. Bul 2024 jylǵy kórsetkishten 13%-ǵa az. Al bıyl 2,2 mln gektar aýmaqqa hımııalyq óńdeý júrgizý josparlanyp otyr. Osylaısha, óńdeý kólemi 2024 jylmen salystyrǵanda 31,5%-ǵa tómendeıdi.
– Shegirtkege qarsy óńdeý kóleminiń azaıýy fıtosanıtarııalyq ahýaldyń turaqtanyp kele jatqanyn kórsetedi. Buǵan ósimdikterdi qorǵaý júıesin jetildirý jáne baqylaý jumystarynyń kúsheıýi áser etti, - dedi Ermek Kenjehanuly.
Onyń sózinshe, óńdeletin aýmaq kólemi ásirese Qostanaı, Aqmola jáne Aqtóbe oblystarynda aıtarlyqtaı qysqarady.
– Máselen, Qostanaı oblysynda óńdeletin jer kólemi 452 myń gektarǵa azaıyp, ótken jylmen salystyrǵanda 62%-ǵa tómendeıdi dep kútilip otyr. Aqmola oblysynda bul kórsetkish 153 myń gektarǵa nemese 78%-ǵa qysqarmaq. Al Aqtóbe oblysynda óńdeý kólemi 89 myń gektarǵa azaıyp, 17%-ǵa tómendeıdi dep boljanyp otyr, - dedi ol.
Jalpy, respýblıka boıynsha hımııalyq óńdeý kólemi 2024 jylmen salystyrǵanda shamamen 900 myń gektarǵa azaıǵan.
Aıta keteıik, buǵan deıin Premer-mınıstr shegirtkege qarsy hımııalyq óńdeý jumystaryn ýaqytyly júrgizýdi tapsyrǵan edi.
