Qazaqstanda shegirtkege qarsy kúres aıaqtaldy: egistikke zııan kelgen joq
ASTANA. KAZINFORM — Elimizde shegirtke zııankesterine qarsy qorǵanys is-sharalary aıaqtaldy. Úkimet aýyl sharýashylyǵy daqyldarynyń zaqymdalýyna jol berilmegenin alǵa tartty.
Memleket basshysynyń agroónerkásip kesheniniń tıimdiligin arttyrý, eksporttyq áleýetti keńeıtý jáne azyq-túlik qaýipsizdigin nyǵaıtý jónindegi tapsyrmalaryn iske asyrý aıasynda Aýyl sharýashylyǵy mınıstrligi fıtosanıtarııalyq qaýipsizdik júıesin jetildirý baǵytynda júıeli jumystar júrgizip keledi. Qabyldanǵan sharalardyń nátıjesinde elimizde shegirtke zııankesterine qarsy qorǵanys is-sharalary tolyq aıaqtaldy.
Hımııalyq óńdeý kólemi 42%-ǵa qysqardy
Sońǵy eki jylda fıtosanıtarııalyq qyzmetti jańǵyrtý, zamanaýı monıtorıng tehnologııalaryn engizý jáne qorǵanys jumystaryn uıymdastyrý tásilderin jetildirý nátıjesinde hımııalyq óńdeý júrgizilgen alqap kólemi 3,1 mln gektardan 1,8 mln gektarǵa deıin qysqardy. Bul — 42 paıyzǵa az.
Sonymen qatar aýyl sharýashylyǵy daqyldarynyń zaqymdanýyna jol berilgen joq.
Bıyl hımııalyq óńdeý jumystary agrotehnıkalyq talaptarǵa sáıkes 1,8 mln gektar alqapta júrgizildi.
Qorǵanys jumystarynyń jańa tásili engizildi
Qol jetkizilgen nátıjeler zııankesterdiń jappaı taralýyna den qoıýdan qaýip-qaterdi erte anyqtaý, oshaqtardy jedel oqshaýlaý jáne fıtosanıtarııalyq táýekelderdiń aldyn alýǵa negizdelgen basqarý júıesine kóshýge múmkindik berdi.
Reformanyń negizgi baǵyttarynyń biri — ósimdikterdi qorǵaý quraldaryn jetkizýden bastap hımııalyq óńdeý jumystaryna deıingi barlyq kezeńdi qamtıtyn biryńǵaı keshendi satyp alý júıesine kóshý boldy.
Bul qorǵanys sharalarynyń sapasyn arttyryp, jumystardyń ýaqytyly oryndalýyn qamtamasyz etti.
Bıýdjet shyǵyny 2 mlrd teńgege qysqardy
Jańartylǵan tásilderdiń arqasynda ekonomıkalyq tıimdilikke de qol jetkizildi.
2026 jyly shegirtkege qarsy kúreske jumsalǵan bıýdjet shyǵyny 2024 jylmen salystyrǵanda 2 mlrd teńgege nemese 25 paıyzǵa azaıdy.
FITOCENTRE júıesi men drondar iske qosyldy
Aýyl sharýashylyǵy mınıstrligi fıtosanıtarııalyq ahýaldy naqty ýaqyt rejıminde baqylaýǵa múmkindik beretin FITOCENTRE geoaqparattyq júıesin ázirlep, paıdalanýǵa engizdi.
Sonymen qatar materıaldyq-tehnıkalyq baza kúsheıtildi:
- monıtorıng pen hımııalyq óńdeý jumystaryna arnalǵan 103 dron satyp alyndy;
- búrký tehnıkasynyń sany 427-den 556-ǵa deıin kóbeıdi.
Bul jumystardyń jedeldigin edáýir arttyrdy.
Shekaradaǵy fıtosanıtarııalyq jaǵdaı turaqty
— Qazirgi ýaqytta shekara mańyndaǵy aýmaqtardaǵy fıtosanıtarııalyq jaǵdaı turaqty. Shegirtke zııankesteriniń Qazaqstan aýmaǵyna kóshý jaǵdaılary tirkelgen joq. Qajetti tehnıka shekaralyq óńirlerge shoǵyrlandyrylyp, qajet bolǵan jaǵdaıda qorǵanys sharalaryn jedel júrgizýge daıyn, — delingen habarlamada.
Aýyl sharýashylyǵy mınıstrligi fıtosanıtarııalyq ahýalǵa turaqty monıtorıng júrgizip, jaǵdaıdy erekshe baqylaýda ustap otyr.
Osyǵan deıin ShQO-da shegirtkeniń jappaı taralýyna tosqaýyl qoıý úshin 18 myń gektar jer óńdelgenin jazdyq.
