Qazaqstanda shegirtkeniń taralý arealy 3,3 esege azaıdy
NUR-SULTAN. QazAqparat – Qazaqstanda shegirtkeniń taralý arealy 3,3 esege azaıdy. Bul týraly QR Aýyl sharýashylyǵy mınıstri Saparhan Omarov aıtty, dep habarlaıdy QazAqparat tilshisi.
«2020 jyly aýyl sharýashylyǵy daqyldarynyń asa qaýipti zııandy organızmderine jáne karantındik obektilerge qarsy 3,8 mln gektar alańǵa, onyń ishinde úıirli shegirtke zııankesterine qarsy 514 myń gektar alańǵa, sondaı-aq karantındik obektilerge qarsy 19,5 myń gektar alańǵa qorǵanysh is-sharalary júrgizildi. Der kezinde qabyldanǵan sharalar shegirtkelerdiń taralý arealyn 3,3 esege azaıtýǵa múmkindik berdi», - dedi mınıstr Úkimet otyrysynda.
Onyń sózine qaraǵanda, ákelinetin ónimderge karantındik fıtosanıtarııalyq baqylaý Memlekettik shekaranyń búkil perımetri boıynsha júzege asyrylýda.
«2020 jyldyń 9 aıy ishinde Qazaqstan Respýblıkasyna karantınge jatqyzylǵan ónimniń ımporty kezinde ósimdikter karantıni salasynda 3 082 ereje buzýshylyq anyqtaldy. Osy oraıda 137 mln teńge somaǵa ákimshilik aıyppul salyndy, bul 2019 jyldyń uqsas kezeńine qaraǵanda 4,7 ese kóp. Mindetti karantındik fıtosanıtarııalyq talaptarǵa jaýap bermeıtin 12,4 myń tonna karantınge jatqyzylǵan ónimdi ákelý joly kesildi, bul ótken jyldyń cáıkes kezeńine qaraǵanda 41,8 paıyzǵa artyq», - dep naqtylady S. Omarov.
