Qazaqstanda shegirtkemen kúreske 1,5 mlrd teńge qarastyrylǵan – QR AShM

NUR-SULTAN. QazAqparat – Egistik alqabyndaǵy shegirtkemen kúreske 1,5 mlrd teńge qarastyrylǵan. Bul týraly QR Aýyl sharýashylyǵy birinshi vıtse-mınıstri Aıdarbek Saparov málimdedi, dep habarlaıdy QazAqparat tilshisi.

«Egistikti saqtaýdyń mańyzdy faktory – shegirtke men ózge de zııankestermen kúres bolyp sanalady. Bıyl úıirli shegirtkeler 554 myń gektarǵa, saıaq shegirtkeler – 266 myń gektar aýmaqqa taralady dep boljanyp otyr. Bul baǵytqa, hımııalyq óńdeý jumystaryna 1,5 mlrd teńge qarastyrylǵan», - dedi spıker Ortalyq kommýnıkatsııalar qyzmetinde ótken brıfıngide.

Onyń aıtýynsha, 8 shildedegi jaǵdaı boıynsha 1,3 mln gektar aýmaqtaǵy dándi-daqyl tekserildi. Nátıjesinde zaqym kelgen 149 myń gektar jer óńdeýden ótti.

Sonymen birge, sharýa qojalyqtary óńdeýge qajetti preparattarmen tolyq qamtamasyz etilgen. Qazaqstanda 1160 preparat tirkelgen jáne paıdalanýǵa ruqsat etilgen, onyń ishinde 611 gerbıtsıd bar.