Qazaqstanda shashtaraz ben sulýlyq salony qyzmetteri 15% qymbattady

ASTANA. QazAqparat - Qazaqstannyń sulýlyq ındýstrııasy ótken jyly 89,9 mlrd teńgege qyzmet kórsetti, dep habarlaıdy QazAqparat ulttyq statbıýroǵa silteme jasap.

2022 jyly kosmetologtar men sulýlyq salondary kórsetken qyzmetter kóleminiń jalpy somasy 89,9 mlrd teńgeni qurady.

Máselen, ótken jyly áıelderge kórsetilgen shashtaraz qyzmetiniń kólemi 28,5 mlrd teńgeni qurady, bul 2021 jylmen salystyrǵanda 4,1 ese kóp.

Al erler shashtarazdarynyń kórsetken qyzmetteriniń jalpy somasy - 10,6 mlrd teńge. Bul 2021 jylmen salystyrǵanda 4,2 mlrd teńgege artyq.

Manıkıýr men pedıkıýrdi qosa alǵanda kórsetilgen kosmetıkalyq qyzmet kólemi ótken jyly 22,2 mlrd teńgeni qurasa, 2021 jyly bul kórsetkish 10,4 mlrd teńge bolǵan.

Sulýlyq salondaryndaǵy ózge de qyzmetter kólemi - 28,4 mlrd teńge (2021 jyly – 11,2 mlrd teńge).

Aıta keteıik, 2023 jyldyń maýsymynda shashtaraz ben sulýlyq salondaryndaǵy qyzmet baǵasy ótken jyldyń maýsymymen salystyrǵanda 15,1% ósti.