Qazaqstanda shash qııý baǵasy sharyqtap ketti

ASTANA. KAZINFORM — Elimizde shashtaraz jáne sulýlyq salony qyzmetteriniń baǵasy bir jyl ishinde 12%-ǵa ósken.

Finprom.kz saıtynyń málimetinshe, bıyl qańtar-naýryz aılarynda shashtaraz jáne sulýlyq salondary kórsetken qyzmet kólemi 18,7 mlrd teńgeni quraǵan.

Bul — ótken jyldyń sáıkes kezeńimen salystyrǵanda 2,3 ese artyq. Bir jyl buryn ósim 18,2%-ǵa deıin tirkelgen edi.

2024 jyldyń mamyr aıynyń sońynda shashtarazdar men sulýlyq salondaryndaǵy qyzmetterdiń baǵasy aıyna 1,4%-ǵa ósken.

Bir aı buryn 1,2% ósim baıqalsa, ótken jyldyń sáıkes kezeńinde 0,5 paıyzdy quraǵan bolatyn.

Bir jyl ishinde shashtaraz jáne sulýlyq salondaryndaǵy qyzmetterdiń baǵasy 12,1%-ǵa artyp otyr. Bir jyl buryn baǵanyń jyldyq ósimi 16,6%-ǵa teń edi.

Atap aıtsaq, bir jyl ishinde manıkıýr qyzmeti — 15,9%-ǵa, áıelder men erlerdiń shash qııýy tıisinshe 14,5%-ǵa jáne 11,4%-ǵa artqan.

Al, epılıatsııa jáne pedıkıýr qyzmetteriniń baǵasy sáıkesinshe 8,3% jáne 7,1% deıin ósken.

Elimizde áıelderdiń shash qııýyna ortasha eseppen 3,6 myń teńgen qajet eken. Erlerdiń shash qııýynyń ortasha baǵasy 2,5 myń teńgege teń.

Áıelderdiń shash qııýynyń eń joǵary baǵasy Almaty jáne Astana qalalarynda tirkeldi (5,3 myń jáne 4,5 myń teńge).

Erlerdiń shash qııýy Almaty men Qaraǵandy oblysynda qaltaǵa salmaq salady. Atalǵan shaharlardaǵy baǵa, sáıkesinshe 3,6 myń jáne 3,1 myń teńgeni qurap otyr