Qazaqstanda sharýashylyqtardaǵy astyq elektrondy esepke alynady

ASTANA. QazAqparat - Qazaqstanda sharýashylyqtardaǵy astyq elektrondy túrde esepke alynatyn bolady. Bul týraly búgin Úkimet úıindegi baspasóz máslıhatynda QR Aýyl sharýashylyǵy mınıstri Saparhan Omarov aıtty, dep habarlaıdy QazAqparat tilshisi.

«Biz elektrondy astyq qolhatyna kóship jatyr. Ázirshe, elektrondy esepke alý elevatorlar deńgeıinde ǵana júrgizilip jatyr. Degenmen, aldaǵy ýaqytta barlyq astyqty qamtý úshin sharýashylyqtar deńgeıine deıin tómen túsýdi josparlap otyrmyz», - dedi mınıstr.

Onyń aıtýynsha, aldaǵy ýaqytta sharýashylyqtan elevatorǵa deıin jetkiziletin bıdaı kólemi elektrondy túrde esepke alynatyn bolady.

«Búgingi kúni memlekettik tizilimnen elevatorlardaǵy búkil astyqty kóre alamyz. Sondyqtan astyqty esepke alý júrgizilmeıdi deýge bolmaıdy. Tipti bizde astyqtyń memlekettik statıstıkasyn júrgizetin uıym da bar», - dedi ol.