Qazaqstanda shamamen 8 mln tonna shóp daıyndaldy
Jalpy, vıtse-mınıstrdiń aıtýynsha, bıyl kóptegen óńirde jemshóp daıyndaý úshin qolaıly aýa raıy jaǵdaılary baıqalady, bul Qazgıdromet derekterimen rastalady. Qazirdiń ózinde qazaqstandyq fermerler 8 mln tonna shóp daıyndady, bul bıylǵa josparlanǵan 25 mln tonnanyń shamamen 32%-y.
Aqmola, Túrkistan jáne Jambyl oblystary jaqsy qarqyn kórsetýde. Tómen qarqyn Pavlodar, Soltústik Qazaqstan, Shyǵys Qazaqstan, Atyraý jáne Mańǵystaý oblystarynda baıqalady.
Amanǵalı Berdalın Aqmola oblysynda aýyl sharýashylyǵy janýarlary sanynyń ósýine qaramastan, shóp daıyndaý jospary qandaı da bir sebeptermen ótken jyldyń deńgeıinde qalyp otyrǵanyn atap ótti. Ol ákimdiktiń nazaryn josparlardy ulǵaıtý jaǵyn qaıta qaraý jáne aldaǵy qystaýǵa qolda bar mal basyn 100% azyqpen qamtamasyz etý qajettigine aýdardy.
Aıta keteıik, bıyl óńirlerdiń jem-shóp shyǵyndaryn sýbsıdııalaýǵa 11,7 mlrd teńge bólindi. Qajet bolǵan jaǵdaıda oblys ákimdikteriniń qosymsha qarajat jiberýge múmkindigi bar.
Budan basqa, 2022 jyldyń qorytyndysy boıynsha azyq-túlik korporatsııasy 235,2 myń tonna jem qoryn qurdy. Bul jem qory mal jáne qus sharýashylyqtaryna arzandatylǵan baǵamen satylatyn bolady. Bul rette, jem-shóp qory 2022 jyldyń ótkizý kóleminen 58%-ǵa asatynyn AShM Mal sharýashylyǵy departamenti dırektorynyń m.a. Baǵlan Aımurzaev atap ótti.
Bıyldan bastap alǵash ret jem-shóp daıyndaý jumystaryn júrgizý úshin jeńildikti baǵamen dızel otynynyń qosymsha kólemi bólinetin bolady. Aýyl sharýashylyǵy taýaryn óndirýshilerdiń ótinimderi boıynsha ákimdikter 57,9 myń tonna kóleminde qajettilik qalyptastyryp úlgerdi. Shamamen jóneltý kelesi aptada bastalady.
Aǵymdaǵy jyly 2023 jylǵa arnalǵan respýblıkalyq bıýdjetti naqtylaý sheńberinde «QazAgroQarjy» AQ jarǵylyq kapıtalyn 20 mlrd teńge somasyna ulǵaıtýǵa jem-shóp daıyndaý tehnıkasy men sýarýdyń utqyr júıelerin satyp alýdy qarjylandyrý úshin bıýdjettik ınvestıtsııalar bólindi.
Budan basqa, mınıstrlik oblys ákimdikteri úshin ǵylymı negizdelgen tásilder men nysanaly ındıkatorlardy eskerip, qosymsha sharalardy engize otyryp, jemshóp óndirisin damytýdyń 2022-2025 jyldarǵa arnalǵan Jol kartasyn keńeıtý boıynsha jumysty bastady. Atap aıtqanda, jol kartasy jańa joǵary ónimdi sorttar men býdandardy engizý arqyly jemshóp daqyldarynyń ónimdiligin arttyrý jónindegi is-sharalarmen tolyqtyrylatyn bolady. Qujatqa sondaı-aq qurǵaq aımaq jaǵdaıynda jem-shóp óndirisiniń sheteldik tájirıbesin zerdeleý jónindegi tarmaq engizilgen. Budan basqa, jańartylǵan jol kartasy sheńberinde jemshóp daıyndaý tehnıkasy men sýarý júıelerin satyp alýdy qarjylandyrý, sondaı-aq jemshóp óndirý jónindegi ǵylymı-zertteý jumystaryn qarjylandyrý úshin jergilikti bıýdjetten qarajat bólý josparlanýda.
Otyrys qorytyndysy boıynsha Amanǵalı Berdalın oblys ákimdikteriniń nazaryn óńirlerde jemshóp daıyndaý qarqynyn kúsheıtý, bul rette jemshóp baǵasyna monıtorıng júrgizý jáne baǵanyń ósýine jol bermeý qajettigine aýdardy.
