Qazaqstanda shamamen 4000 naýqasqa donor aǵzasyn aýystyryp salý qajet
ASTANA. QazAqparat - Búgin Astanada «Aǵzalyq donorlyq jáne erikti qaıtarymsyz qan donorlyǵy» taqyrybynda fleshmob túrindegi aktsııa ótti. Sharany QR Densaýlyq saqtaý jáne áleýmettik damý mınıstriliginiń tapsyrysy boıynsha «Medıtsınalyq qyzmetkerlerdiń quqyqtaryn qorǵaý» Respýblıkalyq qoǵamdyq birlestigi QR Qorǵanys mınıstrligimen birlesip uıymdastyrdy, dep habarlady qoǵamdyq birlsetikten.
Sharanyń maqsaty - donorlyq qyzmet pen erikti qaıtarymsyz qan donorlyǵynyń mańyzdylyǵy men paıdalylyǵy jóninde halyqty aqparattandyrý. Jıyn «Jastar» saraıynyń aldynan bastaý aldy. Onda taqyryptyq bannerlermen, qyzyl sharlarmen bezendirilgen avtokólikter Respýblıka dańǵylynan ótip, qalany aınalyp, «Mega» oıyn-saýyq ortalyǵynyń avtoturǵanyna toqtady. Sol jerde QR Qorǵanys mınıstrliginiń ansambli kontserttik baǵdarlama qoıdy. Bıshiler men ánshiler óz ónerleri arqyly halyqty bul máselege beıjaı qaramaýǵa shaqyrdy. Jınalǵan qaýymǵa júrek pishindi sharlar taratylyp, donor bolýdyń mańyzdylyǵy jóninde túsindirildi. «Qazaqstanda shamamen 4000 naýqasqa donor aǵzasyn aýystyryp salý qajet. Olardyń kóbisi jas, eńbekke qabiletti, otbasy men qoǵamǵa áli talaı paıdasy tıer azamattar. Biraq donorlyq aǵzalardyń jetispeýshiliginen bul adamdar azapty aýrýdan aıyǵa almaı, aqyry baqılyq bolyp jatady», delingen habarlamada.
