Qazaqstanda shalǵaı eldi mekender sanıtarlyq kólikpen qamtamasyz etiledi

ASTANA. KAZINFORM – Densaýlyq saqtaý vıtse-mınıstri Tımýr Muratov aýyldyq jerlerde medıtsınalyq kómektiń qoljetimdiligin arttyrý jáne jedel járdemniń jetý ýaqytyn qysqartý sharalary týraly aıtty.

Baǵdarlamanyń aıasynda 32 ortalyq aýdandyq kópsalaly aýrýhana jańǵyrtylady. Olarda ınsýlttik jáne kardıologııalyq ortalyqtar, medıtsınalyq ońaltý, travmatologııa jáne ortopedııa, hırýrgııa, reanımatsııa jáne qarqyndy terapııa bólimsheleri ashylady. Bólimsheler zamanaýı medıtsınalyq jabdyqtarmen qamtamasyz etiledi.

— Eń aldymen biz 32 kópsalaly aýdandyq aýrýhana quryp jatyrmyz. Bul aýrýhanalar patsıentterge tótenshe jaǵdaılarda «altyn saǵat» aıasynda kómek kórsete alady, — dedi vıtse-mınıstr Ortalyq kommýnıkatsııalar qyzmetinde ótken brıfıngte.

Onyń aıtýynsha, aýyr jaraqat, ınsýlt nemese ınfarkt jaǵdaıynda patsıentti aýrýhanaǵa «altyn saǵat» ishinde jetkizý asa mańyzdy. Bul – negizgi mindetterdiń biri.

Taǵy bir mańyzdy baǵyt – shalǵaı eldi mekenderdi sanıtarlyq kólikpen qamtamasyz etý.

— Barlyq aımaqtyq densaýlyq saqtaý basqarmalary bul máseleni únemi nazarda ustaıdy, logıstıkany jetildirip keledi, — dep túsindirdi Tımýr Muratov.

Vıtse-mınıstrdiń aıtýynsha, jedel járdem kólikteriniń qamtamasyz etilýi normatıvke sáıkes retteledi: ár 10 myń turǵynǵa bir brıgadadan. Halyq kóp shoǵyrlanǵan jáne sırek qonystanǵan aımaqtarda jedel járdem kólikteriniń ornalasý orny turǵyndarǵa jáne aýdandyq aýrýhanalarǵa barynsha jaqyndatylyp otyr.

Jýrnalısterdiń aýyldyq jerlerde jedel járdemdi kútý ýaqytyna qatysty suraǵyna spıker mynadaı jaýap berdi:

• birinshi kategorııa – 10 mınýtqa deıin;

• ekinshi kategorııa – 20 mınýtqa deıin;

• úshinshi kategorııa – 30 mınýtqa deıin;

• ómir men densaýlyqqa qaýip tóndirmeıtin tórtinshi kategorııa – 1 saǵatqa deıin.

Sonymen qatar, ol jedel járdem kólikteriniń jetispeýshiligi aımaqtar boıynsha ártúrli ekenin atap ótti. Ár óńirde bul máseleni sheshý úshin jumystar júrgizilip jatyr.

Eske sala keteıik, buǵan deıin qaza tapqan, múgedektik alǵan medıtsına qyzmetkerleriniń balalaryna qandaı jeńildik bar ekeni habarlanǵan bolatyn.