Qazaqstanda shala týǵan sábılerge qandaı kútim kórsetiledi

ASTANA. KAZINFORM – 2008 jyldan bastap Qazaqstanda dene salmaǵy 500 grammnan asatyn balalarǵa kútim kórsetilip keledi. Bul týraly QR DSM Ana men bala densaýlyǵyn qorǵaý departamentiniń dırektory Maǵrıpa Embergenova aıtyp berdi.

«Qazir reanımatsııa, kútim jáne katamnezdi qamtıtyn úsh kezeńdi kútim júıesi júzege asyrylyp keledi. Dúnıejúzilik densaýlyq saqtaý uıymy usynǵan tıimdi perınataldyq tehnologııalar men qaýipsiz analyq prıntsıpteri engizildi. Qazaqstan Respýblıkasy DDSU-nyń omyraý sútimen qorektendirýdi qorǵaý, qoldaý jáne yntalandyrý, sondaı-aq balaǵa meıirimdi qarym-qatynasty qoldaıtyn klınıkalar jelisin keńeıtý bastamasyna qoldaý kórsetedi», - dedi M. Embergenova Ortalyq kommýnıkatsııalar qyzmetinde.

Sonymen birge, medıtsınalyq jáne áleýmettik jaǵdaılar bolsa, balalar bir jyl boıy beıimdelgen sút qospalarymen tegin qamtylady.

«Neonataldyq hırýrgııanyń damýy jáne bul tehnologııalardyń óńirlerge taralýynyń arqasynda týa bitken aqaýlary bar nárestelerdiń 86%-y ómir súrip kete aldy. Jyl saıyn orta eseppen týa bitken aqaýlary bar 1500 nárestege ota jasalady. Jańa týǵan nárestelerge az ınvazıvti endo-vıdeohırýrgııa úlesi 40%-ǵa deıin ósti», - dedi spıker.

10 perınataldyq ortalyqta neonataldyq hırýrgııa bólimderiniń ashylýy nárestelerdiń ómir súrý múmkindigin aıtarlyqtaı arttyrýǵa múmkindik berdi.

«Qazaqstannyń perzenthanalarynda «Ashyq neonataldyq reanımatsııa» júıesi engizildi. ıAǵnı, shala týǵan nárestelerdiń ata-analary reanımatsııa bólimshelerine barýǵa, balasyna qaraýǵa, kengýrý ádisi boıynsha «terige teri» baılanysyn júzege asyra alady. Bul, árıne, balanyń jaqsy damýyna, jaqsy salmaq qosýyna ákeledi», - deıdi «Astana medıtsına ýnıversıteti» KeAQ neonatologııa kafedrasynyń meńgerýshisi Kúlásh Jaqsylyqova.