Qazaqstanda shahmat úırengisi keletin bala kóp - Anatolıı Karpov
NUR-SULTAN. QazAqparat - Shahmattan álemniń birneshe dúrkin chempıony Anatolıı Karpov qazaqstandyq shahmatshylardyń tabysy jóninde pikir bildirdi, dep habarlaıdy QazAqparat tilshisi.
«Qazaqstanda shahmatshy jigitter tabandap turyp qaldy da, shahmatshy qyzdar jaqsy oınap keledi. Qyzdardyń birneshe júldeli oryn alǵanynan da habardarmyn. Olarǵa tek qana tabys tileımin», - dedi tanymal shahmatshy QR Ulttyq mýzeıinde ótken «Reseı-Qazaqstan - ǵaryshtyq dáýirdi tuńǵysh ashqandar» kórmesinde.
Onyń aıtýynsha, Qazaqstanda shahmatqa qyzyǵýshylyq aıtarlyqtaı artyp keledi.
«Shahmatty mektepterde jáne arnaıy ortalyqtarda úıretedi. Almatyda ózim dál osyndaı eki ortalyqty ashqanmyn. Shahmat úırengisi keletin balalar kóp. Ózge mektepterdi aıtpaǵanda, álgi eki ortalyqta myń jarymnan astam bala jattyǵady. Árıne, sannyń ishinen sapa iriktelip shyǵady», - dedi Anatolıı Karpov.
Foto: tass.ru
