Qazaqstanda shaǵyn kólemdi fýrgondardyń kólik salyǵy qanshalyqty tómendedi

NUR-SULTAN. QazAqparat – Az júkke beıimdelgen kólikterge arnalǵan salyq mólsherlemesinde ózgerister engizilgen edi. Bul ózgerister 2021 jyldyń 1 qańtarynan bastap engizildi jáne bıznes úshin salyq júktemesin jeńildetýge múmkindik beredi, dep habarlaıdy QazAqparat.

Osy oraıda QR Qarjy mınıstrligi Memlekettik kirister komıteti «Baılanys ortalyǵy» basqarmasy basshysynyń orynbasary Aınur Sartaeva atalǵan jańashyldyqtarǵa qatysty túsinik berdi.

«Az tonnaly júk avtomobılderine, onyń ishinde «GAZel» avtokóligi de bar, kólik salyǵynyń stavkalary boıynsha ózgerister engizildi. Buryn «GAZel» júk kóligi ıeleri salyqty qozǵaltqyshynyń kólemine baılanysty jeńil avtomobılder retinde tólegen. Salyq kodeksine engen tolyqtyrýlarǵa sáıkes, gazelder sııaqty júk kólikteri úshin salyq somasy júk kótergishtigine baılanysty esepteledi. Bul ózgeris salyq somasyn orta eseppen 30-50%-ǵa tómendetýge múmkindik berdi. Máselen, qozǵaltqyshynyń kólemi 2500-den 3000 tekshe sm-ge deıingi jáne júk kótergishtigi 1,5 tonnaǵa deıingi júk fýrgondarynyń ıeleri úshin salyq somasy 2021 jyly orta eseppen 26-30 myń teńgeden 14,6 myń teńgege deıin tómendeıdi», - dep túsindirdi A. Sartaeva.

Onyń aıtýynsha, bul ózgeris 2021 jylǵy 1 qańtardan bastap qoldanysqa engizildi. Sondyqtan 2021 jyl úshin osyndaı avtomobılder boıynsha kólik salyǵy tómendetilgen mólsherlememen esepteletin bolady.

«Sońǵy ýaqytta azamattardan «pıkap avtomobılder úshin salyqty esepteý barysynda júk fýrgondarynyń jańa tómendetilgen salyq stavkalaryn qoldanýǵa bola ma» - degen suraqtar kelip túsýde. Degenmen, Salyq kodeksiniń 492-babynyń 4-tarmaǵynyń 1) – tarmaqshasyna sáıkes, jeńil avtomobılderge júkke arnalǵan platformasy jáne júk bóliginen qatty statsıonarlyq qalqanmen bólingen júrgizýshi kabınasy bar jeńil avtomobıl shassıindegi motorly kólik quraldary (pıkap avtomobılder) jatqyzylǵan. Demek, pıkap avtomobılder boıynsha kólik salyǵy jeńil avtomobıl stavkasymen salynady, ıaǵnı qozǵaltqyshynyń kólemi (tekshe sm) boıynsha», - dedi komıtet ókili.

Eskeretin jaıt, kólik salyǵyn jeke tulǵalar ózderi derbes eseptep, tóleýi kerek. Ol úshin «e-Salyq Azamat» mobıldi qosymshasy nemese www.kgd.gov.kz portalyndaǵy «Kalkýlıator» elektrondy servısinde avtokóliktiń sıpattamalaryn kórsetse boldy, salyq avtomatty túrde esepteledi.

«Jalpy, kóligi bar azamattar 2021 jyldyń kólik salyǵyn 2022 jyldyń 1 sáýirinen keshiktirmeı tóleýi qajet. 2 sáýirden bastap árbir keshiktirilgen kún úshin ósimpul esepteledi. Eger salyqty ýaqytyly tólep úlgermese, onda eseptelgen ósimpul mólsherin de «Kalkýlıator» elektrondy servısinde esepteýge bolady. Jeke tulǵalar salyq tóleýdi turǵylyqty jeri boıynsha júrgizedi», - dedi Aınur Sartaeva.